(Disdispensarem, Ka Roy Aragon, Kumakablaagniw)
1. Rason
Kastoy ti pasamak, kabsat.
Agungar dagiti natayen
A nakem no ti sirmata
Riingen dagiti ibit
Dagiti rabii a nasipnget
Iti Real, Infanta, wenno Bongabong,
Ilin-ili amin a pagprusisionan
Dagiti kebbakebba iti barukong
Dagiti pitikpitik iti pispis
Dagiti natay a lamiis iti palad
No kasta a buyaen ti trahedia
Dagiti kanibusanan a maangkat-angkat.
Iti agsapa ditoy balasiw-taaw
A ballasiw dagiti amin pannakairurumen
Dagiti aglakay ken agkabet a parparmata
Dagiti kailian, dikam makatalna, kabsat,
Nga agsindi kadagiti nabangbangluan
A kandela ni Martha Stewart.
Imbag laeng, kunami man, imbag
Laeng a pangsandi ken pangpunno
Kadagiti amin a nagkurangan
Wenno pangugas iti tawid-a-basolmi
Gapu iti ipapanaw
Panagtalakias
Panaglibas
Kadagiti nakaliblibeg a dandanum ti layus
Kadagiti nakaalingget a bagi ti dalluyon
Kadagiti makabagsol a balikas ti linteg
Maipapan kadagiti naitabon a sibibiag
Maipapan kadagiti nakalasat kadagiti pitak
Maipapan kadagiti napakaruan unay-unay,
Dagiti imminum iti danum ti naglipias a kanal
Dagiti nagrennek iti isbo dagiti agtotroso
Isuda a naglak-am iti didigra
Dagiti parbangon nga apagsipasip
Isuda a naglak-am iti saem
Idinto ta dagiti nagbasol
Ket dida man lang nagarumiadan
Addada latta kadagiti tiendaan
A paggatangan iti nabuslon a makan
Pangar-artiokda piman iti boksitda
A di met manglanglangan.
2. Ti Blaagniw
Diak maala't turogko, kabsat,
No diak maisurat dagitoy iti pusok.
Didigraennak ti isipko
Layusenna ti barukongko
Ket dagiti dalluyon ken apres
Ken ti mangliwengweng a danum
Alawendak sadakto met laeng
Ilibbuot iti nalawa a bubon
Dagiti balikas a nagasang,
Dagiti balikas a naadat,
Nakaro, natadem, makasugat.
Aurelio S. Agcaoili
Dis. 13, 2004
No comments:
Post a Comment