(Para ken ni Derick Galam)
Saan a nakabakasion ti kritiko
nga adda iti ballasiw-taaw.
Agsisiim ta agsisiim kadagiti mannaniw
a sitsitik, dagitay man pada nga agiyibbet
kadagiti paliiw ken panirigan a di man
lang napulagidan iti uyokan nga insalog
dagiti bangolan ken baglan kadagiti bantay
dagiti rikna ken sao ken paidam,
kas kadagiti rikna ti agrekrekkang
a kataltalonan, no di agtudo,
di madanuman,
di mabisibisan
ket kadarrato nga agulaw
gapu ti bara ti init
gapu iti karubukob a maparkagan
kas kadagiti sao manipud
kadagiti nasungalngalan
a lusod ken paratong,
pagalaan kadagiti aros-aros ken abal-abal
nga ikirog santo mantekaan,
yasmang iti kilabban a ladawan
dagiti ittip ken kalluto a bayag
kas kadagiti paidam dagiti amin
a linteg dagiti kinikillo a wagas
ni ayat para iti ili ken kakailian,
sipud pay idi aginggana ita,
linteg dagiti kuraddaddeng a ragsak,
no agpasugnod ket agdalupisak
iti tapok nga inisbuan dagiti artek
isuda a mangibabaet kadagiti amin
a di mapnek
ket gapu ta dida maipeksa ti anek-ek
iti presidente ken konggreso dagiti tagainep,
ayna, kaka, adi, barok, kabagis, uliteg
itaray-buagitda metten ti mangikurimes
iti bir wenno basi wenno arak ti basi,
sioktong wenno gin dagiti agimpapadi no adda
uray no alkohol a perresanda iti dalayap
wenno kalamansi nga agbugbugsot
imbag lang a lumansad iti boksit,
sadiay nga ulawenna ti ulaw iti pannakabisin
iti man hustisia wenno maikammet a maipauneg
iti man ayat a nainsapasapan wenno mangilaslasin
iti man lagip iti igado wenno kaldo a kalding,
ayna, ania met ngaminen
dagiti pada a sitsitik a mannaniw
ta maysada met a pada nga ulaw,
agidaniwda iti ayat a natarnaw
ngem dida met idaniw dagiti aglaladut
nga igaaw wenno dagiti alikuno kadagiti karayan
a sippayuten dagiti madaydayaw a mannanakaw,
itayokda ti ere sadanto ipasurot iti angin.
force majeure, kunando, iti lengguahe
a ditay maawatan, datayo a di pay nakapagtakaw
iti man dignidad wenno respeto wenno kinatakneng
iti man parparawpaw a dayaw
iti man pammarang a kinabaknang ti isip,
ta di kadi uray ayat ti idaniw
ket masapul met nga igamer ditoy
dagiti estoria ti daraan a sulisog
dagiti estoria ti patingga ti rugso
dagiti estoria ti panaginnala dagiti rikna
no kasta
nga awan mataog
nga awan mayabraw
nga awan maisagpaw iti agdadata a saluyot
nga awan masagat a bugguong ti makilnawan a garrapon
nga awan ti maaramid ti pusa no di agkukot iti dalikan
nga awan ti kakatawaan ti beggang a maarunan
gapu ta
adda sansilmo a mangyaw-awan iti presidensia
adda baknang a suitik a residente iti kapitolio
adda manglimlimo a natakneng iti konggreso
adda singguarding a presidente iti palasio
isuda, isuda amin dagitoy ti makaigapu
no apay nga iti panagrasuk ti daratayo
iti man rabii wenno kadagiti oras ti kannag
ket ditay marikna dagiti riknatayo
ket ditay ammo dagiti ammotayo
ket ditay maidaniw dagiti daniwtayo.
Ayna, apo, saan a nakabakasion ti kritiko
dagiti parmatatayo. Agsipsiput ta agsipsiput
iti madusagna a sungo. Agpadpadaan
iti panakpakennna a sinsinansao,
partuat dagiti pada a sitsitik a mannaniwtayo.
Aurelio S. Agcaoili
Torrance, CA
Dis. 26, 2004
No comments:
Post a Comment