1.
Awagantay iti sayangguseng ti sabangan
daytoy a didigra iti tartaraudi ti tawen.
Adu a sarsarita ti panagtutuok ti partuaten
dagiti agpakpakada a dalluyon kadatayo,
ipakadadada dagiti dagensen nga anak
dagiti didigra ti nadawel a danum,
daytay rungsot ken ranggas a nangitabon
dagiti malmalday a sagawisiw ken nakigtot a riaw
dagiti ubbing ken kaippasngay a ragsaragsak
iti paskua dagiti naumbi nga ayat iti taaw
iti malem a mangiyin-inaw kadagiti dungngo
iti sardam a mangisiksikog kadagiti rugso
iti ligsay a mangipasngay kadagiti supapak
dagiti sangsangit dagiti balo a gargarakgak.
2.
Dumuko kadatayo ita ti ladawan ti Ormoc
iti bukod a pagilian. Mangal-alia ti dati a buya
dagiti dung-aw a mailudon iti panagpakada
dagiti lungon ken dagiti maitabon nga igaaw
kadagiti bakras dagiti bambantay
kadagiti saklot dagiti kasamekan
kadagiti ules a naimeng a sorpresa dagiti darikmat
a panaggiinnala ti asi, dandaniw, ken pammakawan.
3.
Kastoy met laeng ti buya a mangbibbibi kadatayo amin ita
iti panagpakada ti tawen. Mamutbuteng ti sayangguseng
ti sabangan a maigamer it nadakiwas nga angin,
mailaok iti nariper a tudo kalpasan ti kaudian
a ginggined dagiti gagar a maitamen kadagiti saem,
dagitay guratayo iti baybay, iti napino a kadaratan
dagitay panangilunodtayo kadagiti lunod ti naarsab a panawen
dagitay panagsalsaludsodtayo iti inggana dagiti gibus a di aggibus
a pamunganayan dagiti awanan sungbat a palimed
dagiti anting-anting dagiti allon ken kigaw a rugso
dagiti makaaligagget nga awanan bain a layus
dagiti sugat iti taotao a agpadpadara a panunot.
4.
Didigra daytoy a sayangguseng ti sabangan,
didigra a sayangguseng, mangiyaw-awan.
Ikisapna dagiti anges a maikisap
Iwalinna dagiti pia a maiwalin
Idatonna dagiti karadkad a maidaton
Iwalangna dagiti biag a maiwalang
Sananto ket irugi ti diram-os dagiti kailian
a testigo iti didigra, dagiti makaidalan
iti umuna a binatog dagiti aliaw
kadagiti sao dagiti nagawan,
dagiti makaibaga iti rugsot dagiti buteng
dagiti nakarikna iti rugsot ti sayangguseng.
5.
Agpayso ti sayangguseng ti sabangan.
Ditay met maliklikan ti unget ti layus.
Kas iti di pannakaliklik kadagiti peggad a sagpaminsan.
Ngem kas iti alinuno, maliklikantay ti pangta ti sabangan,
ti gunay ken galad dagiti danum a mangitayok kadatayo
iti pantok sadatayonto ipisok iti libbuot dagiti rekkang
ti mangigaggagara a dawel. Masapultay ita
ti pammasingked dagiti patigmaan, daytay
di parparato a leksiontay iti peggad.
Ikebesatayo dagitoy, itibnok iti kape
A pangpabang-ar iti nakem iti agsapa dagiti rikrikor,
daytay buribor iti panes dagiti napadso a panaggagar.
Tiliwentayonto dagiti sayangguseng ti sabangan,
Ipupuktayo iti karsel ti naturtured itan a sellang.
Aurelio S. Agcaoili
Torrance, CA
Dis. 31, 2004
No comments:
Post a Comment