(Ginasut dagiti nagawan iti tallo a layus--Damag manipud
iti pagilian, Dis. 2004)
1.
Umaykayon,
Umaykayon dakayo a pimmusay,
Idasarmi itan ti napudot a nilugaw
Pangep-ep iti bisin ken saraaw
Para kadagiti agam-amangaw
Para kadagiti naawanan iti gaway
Kalpasan ti nepnep ken bagyo
Kalpasan ti layus a nangikisap
Kadagiti amin a kari ti arbis
Kadagiti amin a kaasi ti linnaaw
Kadagiti amin a sarurong ti aldaw
Kadakami amin a kumarkarappet
Ken apo daga, ken apo bulan
Ken apo init ken tudo ken angin
Ken amin-amin a dios dagiti saning-i
Ken amin-amin a pangamaen ti ranggas
Ken amin-amin a panginaen ti buteng
Ken amin a kaka dagiti isu amin a tutuok
Ken amin a dadakkel dagiti isu amin a rigat
Ita kas idi punganay a rugi ti panagsagaba
Panagilikaka kadagiti disgrasia kas ita, ita
A pananggudasda kadagiti troso ken gabat
A panagipumponda kadagiti sangsangit
Tay ibit a sumarot iti susuop kas iti lamiis
Agindeg kadagit sulinek ti rikna ken utek
Makipagili kadagiti amin a pannakigasanggasat
Kadagiti bakbakras dagiti bantay, kadagiti turod
Tapno sadiay makitinnawar iti ayat kadagiti kayo,
Kamotig, balangkoy, wenno uring kadagiti pungdol
Makiminnaro kadagiti bigat ken kadagiti pul-oy
Iti panawen ti dagaang wenno panagtutudo
Iti panawen ti nakasapsapa unay a gawat
A pakataug-taogan ti pagbagasan a kalawakaw
2.
Umaykayon,
Umaykayon dakayo amin a pimmusay
Dakayo a nagpukaw, nagawan sidongmi
Dakayo amin a nangibati kadagiti libbi
Agugaog sagpaminsan wenno agparikna
Dumawat iti atang kadagiti sabsabot
Iti bawbaw nga ulo wenno bulding a niog
Dumawat iti masukmon a pangilidok
Ay-ayo piman naparkagan a karabukob
3.
Umaykayon. Umaykayon. Umaykayon.
Umaykayon dakayo amin a kararua
Umaykayon dakayo amin a nagawan nga ubbing
Umaykayon dakayo amin a nagawan nga inna
Umaykayon dakayo amin a nagawan nga amma
Umaykayon dakayo amin a nagawan a marigrigat,
Pilay, bulsek, amin dakayon a biktima daytoy
A biag kadagiti siglo dagiti ginasut a paidam
Dakayo nga agtatapaw iti nalibeg a danum
Dakayo a tinagikukua ti apres ken alinuno
Dakayo a residente itan kadagiti walwalang
Dakayo nga al-alia itan kadagiti pagsikuan
Wenno kadagiti salugan wenno sang-atan
Kadagiti man kaingin wenno kadagiti bakir
Dakayo amin a kinamalala ti balla a dawel
Dakayo nga inabalbalay ti lamiis iti agpatnag
4.
Umaykayon, umaykayon ta sagrapenyo
Ti grasia ti taraon nga aggapu iti pitak
Umaykayon ta lak-amenyo ti sinsinan
A bendision ti pagilian a naparammag
Daytay pagiliantayo a pundador dagiti parbo
Daytay pagiliantayo nga ageksport kadagiti laing
Daytay pagiliantayo nga agimport kadagiti lua
Daytay pagiliantayo nga agimurumor iti angin
5.
Umaykayon, umaykayon dakayo amin a natay, nagawan
Umaykayon, umaykayon ta dakayonton ti mangisawang
Ti panangngaasi kadakami amin nga inkay pinanawan
Ti panangidawat panangibabaet kadakami a siiimatang
Dakami a testigo kadagiti amin a panaglablabes
Dakami a testigo kadagiti amin a pannakaidadanes
Dakami a mangitandudo iti aramid a rumbeng
Dakami a mangidaton makipaglidliday a samiweng.
Aurelio S. Agcaoili
Dis. 7, 2004
No comments:
Post a Comment