Wayawaya

Maysa a peggad, alias dagiti alias
a ririsis dagiti rikna iti apagapaman
ti wayawaya a maipapaidam.

Wayawaya kadagiti amin a panawen,
panagwaywayas dagiti inadipen a nakem.
Kas ita.
Kas idi.
Kas idi un-unana,
kas idi punganay dagiti karsel a di makita,
kas idi punganay dagiti maregmeg a bilangen,
ikanawa kadagiti nangisit a kaibaan,
allangonen kas iti panangallangon
iti mababain a duyog
wenno dulang
wenno paglabayan a lakko ti palad,
pagpidutan kadagiti makalunkon
a ragragsak
wenno tagainep ti panagtulakak
wenno tagainep ti panagangtab.

Ita a rabii a tagikukuaennak
dagiti mabisbisin a balikas,
binsabinsayek ti peggad iti wayawaya
kadagiti ila a maibienes
kadagiti aglalaok a regget ken ranggas:

ti ila ti ina a makalagip nga agduayya,
mangbalkot iti mureng sana isalasala,
danggayanna dagiti baed nga anug-og
iti regta dagiti nabannog a saka
iti pusipos dagiti agriuma nga ima.
Agtinawen ti ina iti ganggannaet a taeng,
pinullo itan a tawen a kurkuriruen
ti nailian a barengbareng

ti ila ti naemma a balasang nga immadayo,
makiin-innisem, makiin-innartiok
kadagiti nabengbeng a bulsa,
ti kinabaknang a mangitabtabon,
mangliplipat kadagiti rikna nga agkapkapuyo,
ibassawangna ti kinatakneng ti panagsirkosirko
iti imatang dagiti kumarab-as a kinalamolamo

ti ila ti ama a naitawataw kadagiti disierto
ken lamiis ken leddaang ti kada sakmol
a mangbasbas iti isusubli dagiti amin
nga aldaw a panaglangan iti panagkatangkatang
dagiti annak iti dalan, arubayan, siudad,
umok dagiti amin a santilmo a mangyaw-awan

ti ila dagiti amin nga ila,
amin a kita ti panagpasanaang
dagiti nasugatan nga immadayo
dagiti immadayo a nasugatan
dagiti bannuar a mangisalakan met
dagiti mangsilakan a bannuar met
isuda nga agibaklay iti amin idinto
a dagiti heneral dagiti wayawaya a ganggandiong
agindegda kadagiti kondominium dagiti birkog

idinto a dagiti opisial ti inaldaw-aldaw
a pannakigasanggasattayo agbilbilangda
iti mapagket kadagiti angestayo apaman ti iririing
iti idda a maildagan iti agkurang nga oras
iti maisuko a pisos iti kinabankaban nga allilaw

idi pungay kas ita
iti agnanayon awan patinggana
kas ti arsab nga agsursuro nga agbakuar,
agagawa nga aglamut santo manen agbakuar
idinto a dagiti napanawan agumbida iti betsin
ken asin ken danum, agumbida iti taraon
kadagiti pagbagasan a makiraud,
agumbida iti ayat kadagiti malukong
a nabayagen a nagmulmulluong.

Maysa a peggad, alias dagiti amin nga alias,
ti wayawaya a maipapaidam.


Aurelio S. Agcaoili
Peb. 13, 2005