Maysa a Konsul Ti Agsublin iti Pagilian

(Ken ni Konsul Eva Betita, Pebrero 8, 2006)


Rabii daydi idiay Kaneohe.
Ipakdaarda ti nasarangsang nga angin
dagiti senial ken simbolo
Manipud kadagiti bulong
a nangaplag iti semente a datar.
Insaplidtayo dagiti rugit kadagiti bulsatayo
Tapno ilemmeng dagiti buteng
nga agsiripsirip bayat ti panagkanta
Kadagiti litania dagiti ladingittayo, datayo a nagkalkallautang
Manipud iti pagilian,
manipud iti kinaasinno.

Pinagsasaritaantayo ti sibibiag a pagsasao
A nangiyebkas iti pammakawan gapu iti panangpanaw
Iti pagilian dagiti pusotayo
kadagiti pagirian kadagiti isiptayo.
Saan a mabalin, kinunam, iti wagas a napigpigsa
Ngem dagiti allon ditoy Waikiki,
Narungrungsot ngem dagiti allon ti baybay ti Manila
Ken dagiti taaw a mangliklikmot kadatayo, mangtagtagikua kadagiti kararuatayo.

No adda koma pannakabalinna ket pawilandaka a pumanaw,
Agbatika pay bassit, ditoyka pay laeng,
ditoykan nga aggian.

Ngem ti kinapudno ti panagsubli ket agur-uray kenka,
Agur-uray kadagiti iking ti namnama
ken ti kinaawan daytoy,
Agur-uray iti pagilian nga asideg iti barukong,
Daytay pagilian a datayo met laeng,
Dakami nga immayen ditoy tapno ditoy nga agindeg
Iti nabaybayag pay bassit, agnanayon a mangnamnama
Nga agsubli met iti pagilian a kas iti panagsublim
Ket agdarepdep manen maipapan kadagiti bullalayaw
A mapan agsanglad iti kapetayo a sipupudot pay laeng,
Wenno ti tsa a mangikarkari iti panaglaing.

Pinagsasaritaantayo dagiti posibilidad
Bayat ti panaglak-am iti pangrabii
A sagut ti propesora, bendisionna iti ipapanaw.
Insawangmo a dikanton agsubli
No di laeng kadagiti turod ken bantay
Iti lagip, nabaknang ken namsek,
Mangisalakan ken pudno
Kas iti paggaaktayo.

Dios ti kumuyog, kunami kenka. Ngem ita laeng daytoy.
Uray no kaskasano agsasabatto met laeng dagiti danatayo
Iti daniw dagiti kararuatayo
a mangbirbirok iti maysa ken maysa
Kadagiti nasapa nga oras ti bannawag.
Idiaytayonto nga agsasango ken mangiyebkas
iti nabara a kumusta.
Idiaytayonto nga agsasango ken aggi-innalamano
Iti kinaagnanayon dagiti adu a kinasaayat
ken panagayat,
Adu ta adu, ket naitani iti panagkikita manen
Dagiti pusotayo iti Honolulu,
Kadagiti parparaangan ti pagilian
A sinubbot dagiti derrepdeptayo,
Nabartek ken nakaal-alikaka,
Nakarukruknoy ken nakapaspasnek
Kas iti wagas ti ayat dagiti inna.


Honolulu, HI

No comments: