Dominggo a Di Panagungar

Dominggo daytoy a di panagungar,
Dominggo a pakauna ti adu a gagar.

Ta nagawidka, sika nga estranghero
kadagiti rabii ken aldaw ti karibuso

tapno ramanam ken nanamem taraon
ti agduog a kalgaw a sabidong

maidasar iti maparpamata a dulang
sitiot' pannakarennek nga aggarampang

kadagiti agwingwingiwing nga ubbog
kadagiti agsaksakuntip a wawaig

kadagiti nagati a karkarayan
a pagraramaan santo pagbuburakan

tapno makiranod iti bendision
ti kisang a kampay-idi a labon

mayatang tapno mangpatalged
pammakawan iti kinillo a linteg

ti pagdadayaan ti baknang
ahente ti gasat a mangyaw-awan.

Birokem daytay jumping salad
kadagiti ar-arinunos ti peggad

nga adda kadagiti isem a lusiaw
iti panagtilmon boksit nga agpaparaw

agbirok iti pannakabsog a naimdumduma
daytoy man langa ti ugaw a paan-anawa

agidulin iti pauyo kadagiti maregmeg
agitalaw grasia, pammedped iti lenned.

Dominggo a di panagungar daytoy
panangsursurot iti dana ti balangkoy

daytay sandi ti mababain a bagas
kasukat ti regget iti ima a rapas

agbirok iti panangilaem iti pangmalem
agidiaya iti pangrabii a barengbareng.



Easter Sunday
Marikina