1.
Kuntimpas domino.
Anian a lagip ti gubuayen daytoy a sao kaniak, siak a nakamuttaleng iti manggargari a bantay ditoy Manoa.
Rabii ken aldaw, kuntimpas dominO amin nga adda iti pusok nga agar-arikap iti ayat manipud kadagiti balikas dagiti napaumel nga idda wenno pungan wenno siled a sagrado gapu ta ti laeng arasaas dagiti ulimek ti mangngegan.
Rabii manen ditoy ket ti lagip maipapan iti kuntimpas domino ket tumrarong iti barukongko, agruting ditoy a kas bukel santo agrangpaya a kas kadagiti arapaap dagiti duogan a banyan iti Beretania wenno iti Ala Moana wenno kadagiti rangrangkis nga agtunda iti Tantalus, daytay wanawanan a mangitunda kenka iti mangliwengliweng nga espasio ti langit ken taaw, daytay espasio nga awanan iti rugi gapu ta awanan met iti patingga.
Wenno awanan iti patingga ta awanan met iti rugi.
2.
Kastoy ti biagmi ditoy, dakami nga exilo, dakami nga agbirbirok iti kaipapan manipud kadagiti saning-i a dimi yibit, kadagiti sennaay a dimi naganan, kadagiti iliw a dimi buniagan.
Lipatenmi ti agipeksa ta adda babantot kadagiti sao iti aldaw ken agmatuon ken agsipnget a panangdagdagullit kadagiti ariangga, iti man lagip wenno iti akto a pannakasaksi kadagiti masipngetan nga ub-ubbing iti paggaayaman.
Butbutngento dagiti nataengan dagiti agar-ariwawa nga ub-ubbing--ket mapabutngan uray dagiti ariwawada agingga a dagiti ubbing ken dagiti ariwawada ket agbalin a kari dagiti sumaruno a bigat a maipasngay kadagiti kapiniaan iti Kunia, kadagiti silalamolamo a bara ti pus-ong iti Waikiki wenno ti mababain nga isem iti kursada dagiti rabii ti panagmaymaysa.
Ipakdaar dagiti nataengan dagiti testamento dagiti antigo a panagsegga iti ipapanaw a panagsubli met laeng.
Ibagadanto ti panagruar dagiti mangmangkik ken al-alia kadagiti aggaarimutong a kulalanti kadagiti narurukbos a kaykayo a pinarukbos dagiti dara a nagsayasay kadagti nagkauna a naipatli, iti man gubat, kas idi.
Wenno iti panawen ti kappia, kas ita.
3.
Kuntimpas domino.
Sapaek ti sumrek iti pangisuruan tapno manipud iti siririkep a tawa ket padanonek ti raya ti init nga ibakkuar dagiti turod ti tanap ti Manoa.
Nakakagay dagiti turod iti berde, kasla nakapagimeng kadagiti bulbulong dagiti nalalangto a kaykayo a makigingginnargari iti pul-oy nga isarua ti baybay iti umabagatan.
Tuparen ti ubing nga init ti sarming ti tawat ket bilangek dagiti rabii a diak makaturog, dagiti rabii nga agpatnag nga ar-arapaapek ti kayat a sawen ti kuntimpas domino.
Anian! Mapuyatan ta mapuyatan ti agpatnag!
4.
Liputandak dagiti pasamak.
Liputandak dagiti padas ket kuna ti nabaliwangga nga angin iti pantok ti pasdek a pagbuybuyaak kadagiti umaddang nga umasideg iti altar kadagiti sirok dagiti narukbos a kayo.
Ditoy met laeng ti pagbuyaak kadagiti agkurno iti darang ti init, kas iti maysa a lalaki iti pannakiinnalana iti makigingginnantil nga aldaw.
Timudek dagiti timek iti kaunggak. Kunaen dagiti timek: Kuntimpas domino, kuntimpas domino.
Agwalangwalang ta agwalangwalang ti kaririknak.
Agkuntimpas domino iti agmatuon dagiti mangurkuranges a ragragsak.
A Solver Agcaoili
UH Manoa
Okt 11/06, 7:45 PM
No comments:
Post a Comment