Ti Pabuya iti Retrato
Kuna ti kapsion ti retrato: “Trench of dead Filipino soldiers, Bulacan, 1899, National Archives, Philippine Photo Collection,”
Singgalot-The Ties That Bind: From Colonial Subjects to Citizens, Bishop Museum Exhibit, Honolulu, HI, Okt. 1, 2006)
Agkintayeg ti lasag
Sa ti kaunggan iti pabuya
Dagiti diding.
Iti ili a nakayanakan
A napasag dagiti amin
A tagainep:
Naintar-intar dagiti naabak
A dangadang dagiti soldado
Dagiti agsapa
Ken agsipnget
A panangiyalikaka
Koma iti ayat ti puli
Wenno puli ni ayat.
Ay, maintar-intar
A maitabon dagiti buteng
A kasingin dagiti tulag
Ni kinaranggas,
Sagut ti Espania
Kas met iti regalot ti Amerika
Iti agpatnag a panagrupsa
Dagiti bangkay
Ti hinukospukosda a wayawaya,
Balligi koma ti adda iti pakasaritaan,
Ngem ania ket saan:
Bilangem kadagiti ramay
Dagiti naipatli
Ken sabali pay a ramay
Ken dagiti ramay pay
Dagiti pimmusay
Dagiti sibibiag a natay
Dagiti maipasngay pay laeng
Darepdep man wenno tao
Wenno taotao dagiti darepdep.
Kanen ta kanen dagiti pagikalian
Dagiti marsaak a tured,
Daton dagiti garakgak
Ken sagawisiw
Ti pannakaparmek.
A Solver Agcaoili
Bishop Museum, Honolulu, HI
Okt 1, 2006
No comments:
Post a Comment