Umuna a Panangarkararuak iti Hawai`i

Umuna daytoy a panangarkararuak iti Hawai`i. Halloween, kunada, ket iti panagregreg dagiti bulong ti Oktubre, baliwanggaennakan dagiti agsasamusam a ladawan ti panangikomkomersioda iti buteng ditoy Estados Unidos.

Agkaraiwara dagiti nakabutbuteng a maskara, pinturado iti dara, iti nangisit, iti paripirip dagiti buteng nga awanan nagan.
Iti aruangan dagiti pasdek nga aglaklako iti bussog no la ketdi ta adda doliarmo iti petakam wenno iti bulsam wenno iti plastik a credit cardmo, bunggariaennaka dagiti balay dagiti lawwalawwa a manglanglangan, nanglangan iti kapitalisado a panangbutbutengda kadatao.

Malagipko ita: kastoy met a buya ti agprisenta kenka kadagiti mall iti Kamanilaan--isu met laeng nga isu a buya a natibnokan iti gulib ti puonan, ti buteng, ken kinaagum dagiti negosiante nga uray iti buteng ken pagsapulanda. No dadduma, dikan maamak a makakita kadagitoy. Ngem no dadduma met, kasla agtabugga iti sanguanam dagiti ladawan a makapasidduker ket anian!--anian!--ta mariknam met ti buten, daytay buteng a kaarngi dagiti kailian a tago-ng-tago amangan no matukmaan dagiti ahente ti imigrasion. Narigat a kasasaad daytoy--ti Haloween man wenno tay buteng a maideportar.

Gapu ta adda inaldaw-aldaw a Halloween iti pagilian a naggapuan: ti Halloween dagiti bagas a no kabaelam a gatangen ken kilokilo laengen, saanen a sakosako, saanen a kabankaban.







A Solver Agcaoili
UH Manoa/Nob 5, 2006
















A Solver Agcaoili
Okt 29, 2006
UH Manoa, Honolulu, HI

2 comments:

rva said...

ket ania ngay met ti kaunaan a nakarawam, este, nakararuaam, manongko?

Ariel said...

naglanggong manen, ading, daytoy siteko.
ngem panangarkararua a talaga, kunam sa.