Bisperas ti Ipupusay

(Ket ti pannusa iti ranggas: mabekkel a maibitin iti las-ud ti tallupulo nga aldaw, damag kalpasan a masentensiaan ti diktador.)


1.
Ti bannuarmi ket pinadsoda met
iti kastoy nga aldaw. Dagiti rimmaut iti bukod a daga
dagiti mannaniw ti ranggas. Nauyong dagiti balikasda
kas iti ebanghelio a nilaon dagiti kassaba
dagiti bugawbugaw iti alintatao
dagitay mabutbuteng nga aniwaas
ni kinaasinno gapu ta pammigatda payen piman
dagiti kapuyo ti puso.

Sakbay ti isisingising ti init ti pannusa,
panangrabsut iti agmatuon iti kararua
dagiti amin a manglanglangit a kas kenka
agkarkararag kas iti panagkarkararag idi dagiti madusa
iti kabibilgan a saom, kas kimat nga agbassawang
sumarot kadagiti disierto, angin a mangipuruto
kadagiti amin a rason tapno makitinnibnok
kadagiti lana a mailako kadagiti kabusor
ramen dagiti turayda a kas kenka
iti ay-ayam a linnib-atan
wenno panangtalimudaw kadagiti mayat
iti innala, iti man ayat wenno panaginkukuna.

Mapugsat ti anges kalpasanna,
itaray nga iparagsit nga ipangas
dagiti barabad ti tengnged a mairotan
sa dagiti saksi dagiti amin a gulib
dagiti amin a panagbakabaka tapno saludsuden
iti sayangguseng dagiti agbuybuya a kapanagan
ti kanito ti maudi a pannakaisalakan.

Adda regta ken rugso ti pakasaritaan.
Idulinna kadagiti baul ti agnanayon a lagip
dagiti lugar ti unget dagiti bala ken kanion
dagiti kanalbuong ti bales a kankanayon a pangrabii
iti sipnget dagiti maidasay ng aldaw.

2.
No agkitayo iti bannuarmi
a pinatay dagiti kinarkok
idanonmo ti ayatmi,
pakumusta met manipud
iti inulilada ng ali. Aginnga ita, kunam,
ket ti pakasaritaan ket kaskasdi:
rautenda dagiti bannawag
nga in-inawen dagiti rabii
a panagpalpalamami iti kaasi.

3.
No makitam ti diktadormi
ibagam a sayang, sayang ti inrugi
inringpas dagiti nagindidi idi nga ab-abuyot
ti ranggas dagiti kararanggasan a bulbuli
wenno dagiti agarsab ken aganangsab a tali
wenno dagiti sarangusong a dadaulomi.


A Solver Agcaoili
UH Manoa, HI
Dis 30/06

2 comments:

Ka Iddo said...

NAGASAT A BARO A TAWENMO, KA ARIEL!! KASTA MET KADAKAYO AMIN, KAKABSAT!!!

Ariel said...

Agruruoy a bunga ti 2007 ti apiten ken yunegyo kadagiti pagtaengan ken puspusoyo, kakabsat.