Daniw iti Pannakaiputong iti Korona

(Inyebkas iti pannakakorona da Jolly Sanchez Saladino, Mrs. Dingrenios; Ms. Monica Janelle Pacleb, Ms. Dingrenios; ken Ms. Tejani Paglinawan Saladino, Junior Ms. Dingrenios, Febrero 23, 2007, Pacific Beach Hotel, Waikiki, Honolulu, Hawaii)


Ti ngayed ti rabii ti sudi ti aribai
Ti kayaw ti amin, amin a panagkari
Isu ken ti sabali a reyna ken prinsesa
Isuda amin a daydayawentayo ita

Ti balangattayo kas iti sabong
Ti namaris nga ayat ti tallaong
Datayo amin ita a testigo
Mangmatmat itoy a kanito

Ngayed iti ngayed, pintas iti pintas
Daytoy a pannakabalangat ti imnas
Datayo a makipagragragsak
Datayo ti agdaton iti garakgak

Ta buyaentayo ita ti ubing a rabii
Pakaitampokan intay panangaklili
Kenni reyna a Jolly, ari a babai
Ken ni reyna Janelle, balasang nga aribai

Iti nasagudayan a Tejanitay nga agtaklin
Iti ubing a reyna, makaammo iti adu a laing
Da Jolly, Janelle ken Tejana, napusaksak a reyna
Isuda kakabsat, isuda ti mangilalaem ita

Kas idi un-unana, iburaytay sam-it ni ayat
Isaguttay nga idaton kadagitoy a kakabsat
Ta ti tanikala ti pinnategtay amin itatta
Isu ken isu met laeng ti sangapada a tanikala

Ket ngarud markaantay daytoy a rabii
Ikur-ittayo iti libro ti adu a lagip ti ili
Datayo a pimmanaw tapno di agsabali
Datayo nga immadayo tapno agsubli

Ta iti daytoy a ngayed ti parang ita a rabii
Ket ngayed met laeng ti Dingras a tagibi
Taraken ti isip, maladaga ti kananakem
Ti Dingras nga ili dagiti amin a manakem

Rambakantayo daytoy a kanito
Oras ti panagsangal iti karayo
Kinnadua a binnunggoy a panagkammayet
Panagmaymaysa dagiti sabasabali a panggep

Ta daytoy ti oras ti selebrasion
Panangisagawisiw manen ti kansion
Panangiduayya iti dayyeng ti barukong
Panangisala iti ragsak ita a punsion

Ta daytoy ti oras ti pananglagip
Pananglukag manen kadagiti darepdep
Isuda a naidulin iti baul ti tagainep
Datayo a makaammo iti dungngo ti sulinek.

Ita danggayantay ti ragsak dagiti reyna
Ikutantay kas kadakuada dagiti agsapa
Ta dagiti dayag kadagiti tallo a korona
Kas dayag met laeng ti pagarian iti pusoda

Saksiantay ngarud daytoy a panagturay
Panangipakita ni Mrs Dingras ti saguday
Panangiburay ni Ms Dingras sudi ti panunot
Panangited ni Junior Ms Dingras iti sagut

Saguday, sudi ti panunot, sagut
Dagitoy ti idatonda a siraragut
Ngarud aglugaytay a padapada
Datayo a saksi ti pannakakorona

Kadakuada nga itedtay ti sipsipat
Kadakuada nga agtamed awan labas
Kadakuada nga agkurno iti bigbigat
Kadakuada nga agsaludar awan erras.

Naimbag a rabii kadakayo tallo a sabong
Naimbag a rabii kadakayo met a tallaong
Iti maysa ken maysa itedtay ti bendision
Iti maysa ken maysa isagut ti kankansion.

A Solver Agcaoili
UH Manoa/ Feb 23, 2007

2 comments:

RVA said...

rebbengna a mabalangatanka metten, manong a dumadaniw ken bumubucaneg, kas maysa a laureado a mannaniw ti amianan!

daytoy ket koma a banag ti maysa nga asikasuen ti GUMIL Filipinas: ti regular koma a pannakapili dagiti poet laureate nga ilokano!

Ariel said...

roy:
sumgar ti dutdotko, adingko. pakaidayawak uray laeng dagiti saritam. ngem kas kenka, ditay birbiroken ti dayaw. datayo ti mangted koma iti pammadayaw iti sabali, di ngamin. but i am honored.
umaykanto agsarita iti Nakem conference, wen?