Rurog ti Darepdep

Rurog ti darepdep
ti maidasar iti dulang.

Amin ket rurog:
rurog ti kalluto nga innapuy
rurog ti makaldo a dinengdeng
rurog ti tinuno a buntiek
sa ti rurog a pagsinam-it
kas kadagiti balikas
dagiti kakadua
a mannurat iti rugi ti daniw
isuda a nakalipaten
iti kurditan ni sayaat
kas iti panagapo iti ilalaem
iti taeng ti sabali
wenno panaglugay iti ipapanaw.

Idi nabayagen a panawen,
adda ritual iti nasayaat a balikas:
agasanna dagiti kas-ang
wenno limdo
wenno aminen a sakit ti nakem
ket iti tangatang, sadiay a kakakibin
dagiti musa nga agimbag-a-bigat
iti maipasngay nga aldaw.

Ita, saanen a kas idi.

Kadagiti kadua a mannurat,
maysa a rurog
ti lengguahe nga ay-ayem iti rabii,
iti likod dagiti manto ni gulib
wenno kinatakrot:
awanan-nagan dagiti mannurat
nga aginlalaing a mangtagikua
iti premio ti pakasaritaan.

Kas bunubon dagitoy
a maitukit kadagiti kinelleng
ti dila wenno bangbangir nga isem
pangay-ayo iti agpapauyo
a kutibeng iti suli
kas iti pannakiringgor
no tuldekan wenno saan
ti maipapan iti panagipangres
wenno panangsul-oy
iti telkak santo met laeng piliten
nga ibakkuar
tapno aramiden daytoy
a binatog ti agduduayya
a daniw.

A Solver Agcaoili
UH Manoa
Feb 14/07

No comments: