Parparato

Kastakami ditoy. Agpapadayakami
nga aggagarakgak a pangilingedmi
kadagiti sanaang nga ik-ikutan
uk-ukopan santo idawat iti rebulto
dagiti narungsot nga angin
nga agibbong koma a kadua
dagiti ibbong a pampanunot
dagiti naktidiakes a baybay ti Waianai wenno Kapolei
a no agsayyo kadagiti agragut nga allon
ket kunam la no agmaya a bula
agpagunggan nga aglibas iti kulungan
ket iti pangganakan nga agpasalakan
agumbi piman kas iti allon iti kadaratan
sadiay nga agpasaklot makiinnikot
iti darang ti init a nakialimpatok
iti sabangan dagiti amin nga ayat nga agtitibnok
kas iti panagun-unnoy ti bula iti pangganakan
kas iti panagun-unnoy ti narasay a tudo
nga agsuek ti agrekrekkang a bangkag
kas iti panagsuek ti raya iti danum
agungap kas panangallawat iti duyok
ti likido a rugso
ti tudo kas sudsod iti kaingin a makiki a mamulaan
no agisambot iti mais kalpasan ti umuna a bayakabak.

Yagawami ti agkatakatawa
ta kasta ngarud ti gasat dagiti pimpiman
a rikna. No makalagipkami, agabrawkami
iti marunggay a kas sandi dagiti saning-i
ket manipud ti digo, agbirokkami
iti naisangsangayan a regta iti panagsubli
iti mangliplipat nga ili.


A Solver Agcaoili
UH Manoa/Mar 4-07

No comments: