Pasmok ti Kaimnasan a Kidem

(Ken Jim Agpalo & Roy Aragon, singin a napeklan a mannaniw ni ayat, ta kasla simotsimot ti rugsoda iti apuy)

Agisemak a mangnanam iti kananakem,
singin a mannaniw ni kigaw nga ayat.

Agsalogak koma a mapan
iti tanap dagiti agbulos
a rikna ngem ta immay ti raragutan:

adda gartem kadagiti sirmata ti umalimpatok
nga ay-ayam wenno tay soltero a panagngirsingirsi
kas iti panagellek a pimpiman
wenno tay panagkudisi iti kalgaw
a ti palapal ket agbirok
iti pannakapalek tapno tuknuenna
ti kangatuan a langit ket sadiay a makisinnala
kadagiti kimmapas nga ulep a siketsiketen
ti amian kadagiti mail-ila a tibbayo
wenno pulso wenno bubuteng
iti busat dagiti balikas
nga aglemmeng iti dila?

Sabalin itan ta nataenganen dagiti darikmat
A ta no siririing dagiti ubbing a rikna,
ayabam ti turog, agararawka iti bannog
kadagiti karabukobba tapno iti apagkanito
ket margaanda iti yepyep
sadanto sumuko kadagiti adu't naganna
a tagainep ti panagdakkel
ken panagsariwawek dagiti sellang
luppo tengnged bibig piditpidit.

iti ulimek a tagikukuaen ti yepyep dagitoy,
sadiay a madi manglangan
ti beggang iti dakulap
tay alipato iti appupo
alinaga iti apros a mangrangrangtay
kadagiti panaglangan
iti siglosiglo a darikmat
ni nasudi nga ayat a di agressat.

Makaellekak a mangimatang
iti panunotyo:
tay panagkulibagtong, kas pagarigan,
ti kinatao a dumarop kadagiti ayup
iti nabunniaganen a dakiwas ti utek,
daytay sariwarek a garaw dagiti ramay
nga agtunda kadagiti apres ti waig
karayan baybay aripit
kadagiti barukong nga agur-uray
iti pannakairareb santo iti lansad
dagiti aggargarraigi a paggaak
ket lansaden ta lansaden ti umuna
ken tartaraudi nga anges.

Agsuek ti kudisi iti agur-uray
a daga. Sudakenna ti barukong
ti pagay-ayaman a mangnamnama iti layus
ti di makatututor a linnaaw ti agsapa.

A Solver Agcaoili
UH Manoa/Mar 5-07

1 comment:

RVA said...

agyamanak, mang ariel, iti daytoy... kidem ti kaimnasan a pasmok...