Ragsak ti Saltek

Iti disoras ti atiddong a parbangon,
agrararag-o dagiti saltek,
saan nga iti bautek
ta awan met manong a sumangpet
no di iti pasamano a sumango
iti agmurmuray a dalan, kas iti kasla
di mamingga nga H-1
a sumalpot iti Diamond Head.
Nagbaliwen dagiti buya
iti panagtaltalanggutang.
Iti Los Angeles,
masaksiam koma itan dagiti buya
ti panagrurusing, kas ti panagsalsa dagiti bulong
iti Palos Verdes, agay-ayabda kadagiti pul-oy
iti baybay a kasumbangir ti ili a naggapuan.
Ngem ta kasta met ti gasat.
Uray no an-annuem, adda dagiti buenas
uray no iti naminsan ket di nauringan ti tamudo
wenno nakaraman iti bugguong a naangpep,
pamedped piman iti bisin
iti panangil-iliw iti lanit iti bibig,
tay toyo iti patis iti kamatis
iti tanamitim a panglagip
iti anito dagiti agbellad a mais
wenno ti innapuy nga agittip.
Di met ngamin agressat ti panagulser
dagiti pagbagasan iti napalabas a panawen
a dagiti mannibrong kadagiti bendision
ti ili ket dida met nagparaman
uray man laeng no maysa a pulagid
a diro manipud kadagiti ar-artiokda
a naisangal iti balabala dagiti panggep
a nangisit, kas kadagiti ulep itatta,
mangipakpakdaar iti tudo nga agsambuambo
manglayus kadagiti sangsangit iti panagbirbirok
iti doliar wenno kaikarian
iti ayat wenno kanibusanan
pagpilian dagiti adu a pimpiman ditoy
iti laksid ti panaglablabonan.
Ni kaano man ket di agtagilasag ti linteg
iti kalkalsada dagiti agkalkallautang.
Kas iti birabid a tulid a tulid,
awan kumpet a rikna iti lugar a nagilian
no awan duayya a yeg ti panagtektek
dagiti saltek iti agrubrubrob a dalikan.

Agkatkatawa ti beggang, kunada idi,
naynayda a sungrodan iti madredekakaw
tapno mapadisi ti pangontra dagiti bugawbugaw.
Tapno saan nga ageppes ti bulsa, kunada,
saan nga agmalmalanga wenno agliday.

Ngarud sungbatam ti saltek, tallo a tuktok
iti kayo a diding, nalimbong a sungbat
ti agsapa nga agngilngilin.


A Solver Agcaoili
UH Manoa/Mar 5-07

No comments: