Sumang iti Agtaraok a Karasaen

1.
Inaldaw-aldaw a ritual daytoy:
agtaraok ti karasaen, ti residente a mannurat
iti internet, wenno blog, aminen,
isuna nga experto iti panangilupitlupit iti daniw
wenno ti bileg daytoy, kas gita
a kontra ti kinapalangguad dagiti bigat.

Saan a bale a dunggiaranna ti sabali
no di la ketdi madunggiaran ti saona
ta kasano aya a makita wenno makarawa
ti bunggaria a kinapimpiman,
pakabuklan ti kinaasinnona,
isuna a takrot iti lawag ta runawen
ti ray-a ti agsiuman ken ayat?

Maasika kadagiti balikas nga inna isawang:
awan ditoy ti panagsurnad, panagsantiguar
panangdawdayaw iti poder ti pagsasao
a tawid ti kaputotan. Kasla daytoy iti alipugpog

a mangitayyok iti pampanunot, mangtikaw
ket no mamatika, kas iti komedia dagiti parparato
a pammarang, biagmo, ay biagmo ti maiwalang.

Wenno ti ulom ketdi a kayatna a putolen,
isebba kadagiti beggang iti balikasna a naasinan,
makadunor, masugkik, ket mabatika lattan
a pimpiman, iti suli ti ulimek nga agpasanaang.

Iti sagrado nga ulimek nga inkarim ti ulimek,

Dimo balusingsingen ti kari, kas inkari:
adda duogan a tulag uray iti kanito ti pannakasudak
ti rikna wenno bibig, katawa wenno piditpidit.

Mamatika nga iti labes dagiti banawbaw a sao,
sadiay a matimud ti pannakapnek, panagilala
kadaytay balikas a silabario ti kinadakes iti labes
ti ringgor ti tao, wenno ti mannurat nga agpampamayan
wenno tay mannurat a di met mannurat
no di ket kakuntsaba dagiti kigaw a linabag
wenno kamalala dagiti di naullo a dayaw
ket iti buribor ti ulo, ti sabali ti pamkuatanna

a dangdangran, tebbaen kas iti saba
nga addaan makabussog a sabunganay
ti plumana ket panabas nga awanan tadem
no di ket lati ken tetanus
saan a kas iti pluma a sagrado
a mawaw piman iti pudno a sayaat
imbag, laing, birtud, sirmata, namnama
saan a ti gulib nga adda kadagiti binatog

ti eppes nga isip wenno ti ubbaw a karit
a gamengna ti pananglimlimo, umsi, ulbod
a kagayna ti panaglemmengna kadagiti anniniwan
saan a dagiti aldaw a partuaten dagiti limdo
nga adda kadagiti ikur-it a panangimameg
iti kapada, panangpaumel iti patiray-ok
ti tribu a pakaibilangan, paginkamkamengan.

2.
Agtaraok ti agukop a karasaen,
adda sumang ti gita iti malem
a nasalemsem, kontra iti kontra
iti panangabalbalay iti kassaba
ti mannaniw iti managridridap nga agsapa.

A Solver Agcaoili
UH Manoa/Mar 22-07

2 comments:

Anonymous said...

kamalala dagiti dingraw iti pansitan dagiti agtartaraok a karasaen, ka ariel... imbes a maidayag inda ketdi ramesen dagiti sagrado a balikas

Ariel said...

agpayso, kabsat. adda kadi pay nabati a pudno a mannurat iti Kordiliera, Kakagayanan, ken Kailokuan?-- Amianan--ken iti diaspora?