Ti bomba ti mangibaga. Adda desperasion iti angin a malang-ab,
iti man aldaw wenno ti nagabay nga agpatnag. Ta kasano kadi, aya
ti manglemmes iti bain no awan maisubo sagpaminsan?
Iti eksena, adda dagiti kalaban: ti pulitiko a ninong ti gayaman
wenno ti apges ti tian. Naktidiablo la ketdin a biag ta no adda
man laeng waragawag, agar-arakattotda piman a manglangan!
Salaysayen ti henesis ti dagensen iti barukong:
ubbing a mammigat iti kari ti pangngaldaw
ket iti dulang awan mata ti bisin kadagiti maulaw
iti bisin. Planuen ni Ducat ti panagsuplongna iti tangatang,
wenno iti langit dagiti karkararag a di mangmangngegan:
awanan lapayag ti santo sepulkro, awanan mata ti dakes
iti labes dagiti taeng a ti pinggan ken mabisbisinan.
Bay-am ngarud a ti bomba ti agbalikas, agsao iti dakes
amin a kinadakes, kas iti kanibusanan dagiti palangguad
dagiti pabunar dagiti babaknang nga idiay, aguraytay
iti mangabngaban a tulang, wenno ti maregmeg a kasla
mukat wenno ti nabangles a katay iti titilmonan.
Palibbuongek, kuna ni Ducat, bettakek amin a mabettak,
ti bangabanga, kas pagarigan dagiti agdudungsa nga antukab,
nabsog a nagtulakak kas kadagiti buaya nga agan-anak
di makarikna iti rugi ti tigab wenno panagangtab
kas iti padi, ti pimpiman nga anak ti dios nga agsuysuyaab
makaturog piman kaadu't nakaparintumeng nga agsurnad.
A Solver Agcaoili
UH Manoa/Abr 17-07
No comments:
Post a Comment