Kammayet ti Programa ti Unibersidad ken ti Komunidad
(Panglukat a Bitla ni A. S. Agcaoili iti 2007 Pabuya ti Drama, Kinnantaan, ken Ababa a Video, Ilokano and Philippine Drama and Film Program, U of Hawai`i at Manoa, Art Auditorium, Abril 14, 2007)
Iti nagan ti Ilokano and Philippine Drama and Film Program ti Unibersidad ti Hawai`i iti Manoa, iti nagan dagiti adalanmi a mangipabuya kadagiti talugadingda ita a bigat, ken kasta met nga iti nagan dagiti mangisursuro iti daytoy a programa, palugodandak koma a mangkablaaw ken mangpadanon kadakayo.
Iti daytoy a tallaong, sidadayawkami a mangkibin kadagiti adalanmi iti daytoy a programa tapno iti kasta ket sipapannakkelda a mangiparang kadatayo amin dagiti iduldulinda a kinasaririt a mangipakita iti panagayatda iti puli a nagtaudanda, a numan pay kaaduanna kadakuada ti nayanak ditoy wenno ditoyen ti nakatubayan dagiti kananakem ken kapampanunotanda, sindadaan dagitoy nga adalan a sublian dagiti kannawid, kaugalian, ken kultura ti puli a naggapuanda. Daytoy a kinasindadaan iti puso ken kararua ket maysa a birtud para kadakami amin iti daytoy a programa, birtud a bubon met laeng ti panangipasindayagmi kadagiti kabaelanda tapno iti kasta, kaduadakayo a kas saksi, maipagpannakkeltayo amin ida.
Palugodandak met koma a mangidaton iti daytoy a program—ti Fiesta ti Kinnantaan, Drama, ken Ababa a Video—kadagiti dua a propesora ti programa nga agpada a nagretiro iti daytoy a tawen ti panagseserrek, da Propesora Prescilla Llague Espiritu ken Dr. Josie Paz Clausen. Iti nagbaetan da Propesora Espiritu ken Dr Clausen ket innem a pulo ket tallo a tawen a panangtagtagibi iti programa, naunday a panawen a panangilala iti kultural ken pagsasao dagiti Ilokano a naitawataw ditoy Estado ti Hawai`i iti las-ud ti sangagasuten a tawen. Saan nga aksidente nga iti sentenario ti selebrasion ti yuumay dagiti immuna a sakada ket ita met a selebrararantayo ti pananglagiptayo iti utang a naimbag a nakem kada Propesora Espiritu ken Dr. Clausen. Ngarud, kakabsat, kaduaendak iti panaglugaytayo kada Manang Prescy ken Manang Josie ket babaen iti daytoy a panagpipiestatayo ita, itedtayo kadakuada ti panagyaman kadakuada gapu iti anus, saldet, ken kinaimbag. Kasta met itedtayo kadakuada ti bendision tapno iti panawen ti panagretiroda ket umagapay kadakuada ti salun-at, pia, ragsak, ken karadkad.
Naisangsangayan daytoy nga aldaw ta maimatangantay manen ti maysa a buya ti panagkakammayet. Partikular ti ragsak kaniak gapu iti pannakaimatangko ti kaadda dagiti nagannak, kabagian, komunidad, ken dagiti aminen a tumultulong kadatayo tapno maparang-aytayo daytoy a programa a saan laeng a programa ti Unibersidad no di ket programa ti intero a komunidad dagiti in-inabo ni Ilokano ken dagiti taga-Amianan a naisadsad ditoy a lugar.
Ngarud, buyogandak iti panangkablaawko kadagtii opisial ken kamkameng ti Timpuyog: Ilokano Students Organization iti awan ressat a panaggamuloda tapno maisayangkat daytoy a fiesta ita a bigat. Naimbag a bigatyo amin a sangapada ken agbiagkayo!
No comments:
Post a Comment