Mangted iti ragsak ken inanama ken leddaang ti panagrurusing.
No kastoy a dumteng ti panagsipungtuan ti panagrurusing ken kalgaw, agarriangga nga agbalaw nga aggagarampang dagiti sabong iti bakras dagiti bambantay iti California ken Nevada, dua nga estado nga alisto no kua a pagpallailangan no sumken ti babantot iti barukong ken nakem ken panunot. Kasano a malipatan ti nasurok a tallo a tawen a panagkalkallautang kadagitoy a disso, a no marikna ti panagbudobudo ti dakulap--iti lakkona nga addaan uged a rapas, iti kannigid man wenno iti kannawan--ket manggargari dagiti casino a sadiay ket parmeken a patayen a kettelen dagiti addaan makukuarta dagiti di maturog ken di agpakaturog nga oras?
Malagipko idi umuna a maadakko dagiti kakastoy a buya nabayagen a tawen ti napalabas: ti buya ti ay-ayam dagiti sabong a makigingginnantil iti nabara nga aldaw ken ti ay-ayam nga adda kadagiti uneg dagiti pasdek a pakiginggingnasatan dagiti agar-arapaap a makadiakpat a kas kaniak.
Ayna, adda kararag ken araraw ken lualo iti sabong kas iti kaadda met laeng iti kararag ken araraw ken lualo kadagiti bibig nga agtantanamitim. Kunak iti bagik, kas panangay-ayo iti panagpakada iti manmano a doliar a no agindeg iti petaka ket kunam la no agkasera iti apagbiit ta no mabigatan ket agtalapuagaw a kasla agarog a kawitan.
Kunak iti gayyem a taga-Los Angeles idi kalman kabayatan iti panagen-ensayomi iti Salidsid a sala dagiti Kalinga nga ipabuyami iti Fiesta Fillipino, "Malagipko dagiti bakras ti bantay iti California, dagiti agariangga a sabong, dagiti maris nga agdadangadang, ti natangig ken napalangguad a pannakikarinioda iti angin, bulan, arbis, lam-ek, ken aldaw."
Dati a taga Los Angeles ti gayyem ket kinuna nga insungbat, "Saanmi nga ipalagip kaniak."
Addakami iti Waipahu, iti lugar dagiti kaunasan idi, iti purok dagiti plantasion ken dagiti agin-indeg kadagiti plantasion. Iti lumaud ket ti simborio ti pagdapilan a kuna iti ni Manong Amado Yoro kaniak a pagilasinanda no sadinno ti papananda no kasta a didan ammo ti yanda no addada iti tengnga dagiti kaunasan.
Iti daytoy a panagrurusing, adda angrag iti Honolulu.
Adda dagiti seniales ti panagungar manen ti uniberso ken ti daga ken ti aglawlaw ngem saan a kas iti Kadaklan nga Estados Unidos a makitam ta makitan ti gidiat dagiti klima ken panawen. Napunno siguro itan dagiti agdidigos idiay Palos Verdes, dagiti agparakayda iti danum idiay San Pedro, dagiti agbanbanniit iti Pier ti Torrance, lugar a kankanayon a pappapanan tapno sadiay ket ibelleng dagiti babantot iti barukong, iwasiwas iti umatiwerwer nga angin, ken bulosan iti allon santo sikbaben ti mangliwengliweng a taaw.
Sabali ngamin ditoy Oahu, ti isla a pagsasarak dagiti makipagindeg iti pagarian ti Hawai`i idi un-unana, idi saan pay laeng a sinakbab ti peligro daytoy a peligro, idi ti kapampanunotan ti kaaduan ket saan ti pagsayaatan dagiti nabibileg no di ket ti pagimbagan dagiti maipadpadisi, dagiti maiwalinwalin--adayo iti ugali dagiti nakabaddek iti daytoy a gloria a saan met--mannurat man wenno mannurot--a no mangiluges iti kapada ket kayarigna ti angrag iti kalgaw, ti pannakasiram dagiti bulong, ti panagkuretret dagiti sabong gapu iti isusukoda iti pudot, tikag, ken kinapaidam ti nalamiis a pul-oy wenno ti makapabang-ar nga angin wenno ti bibisbis ti arimukamok.
Iti Mainland, makitam ti paggidiatan nga ibunnang dagiti buya iti aglawlaw: ti sabong, kas pagarigan, a sumirsirip kadagiti rekkang, agbirbirok iti wayawaya nga agtundo iti rayray ti init iti dumaya.
Wenno ti makayepyep a pul-oy manipud iti baybay ket imasem ta imasem ti panangsanglad ti presko nga angin iti barukong babaen ti panangipug-aw iti sabidong nga adda iti aangsan.
No kasta a dumteng ti pannakautoy gapu iti nabayag a panagur-uray tapno mabukel manen ti pamilia a pinanawan, agtamdagka iti tawa iti kakastoy a rabii ti kalgaw wenno iti sardam dagiti linglingay. Iti adayo ket ti narayray a silnag ti bulan.
Malagipmo ti talon, ti bangkak, ti panagay-ayam iti kudisi wenno 'mapanen' no kasta a nalawang ti bulan ket dagiti anniniwan dagiti ubbing ket atitiddog.
Birokek ti Panagrurising iti Honolulu ket makitak ti kambas ti malem a kikkikien dagiti bullalayaw iti pantok dagiti agis-isem a bambantay iti laud.
A Solver Agcaoili
UH Manoa/May 7-07
No comments:
Post a Comment