Kenka, baro a bannuar ti ili: Saantayo kadi laeng a tagiruot
Dagiti mamaingel wenno dagiti aginkukuna laeng? Kasla
Koma binta, wenno ar-arkos, kas pagarigan. Insublida manen
Kasinsin a kailian a kapada iti gasat ti panangal-aladda
Kadagiti kaiskuarteran nga agtunda kadagiti pagpalpallailangan
Dagiti adda mabilinna iti man ili wenno iti sabali a lugar.
Kasano met ngamin nga ibardaymo a kasla bilag ti kinakurapay?
Aya, ket di met kas karina ti mangallilaw iti turista, ilako
Kenkuana ti panaglennek ti init babaen ti panangidulin
Iti aldaw a mangipakita iti agdadata a langa ti siudad
Dagiti lugar a mailako amin a kita ti ragsak, gatad por gatad,
Ania man a klase, lasag, kinnikinni, kumpas ti patong
Wenno panaganangsab kadagiti sulsuli wenno idda
A maminsan laeng a makita, dinton sublian pay
Ta sabalinto manen ti pagaponan a kadua ti aggatang.
Mariput dagiti rikna iti kakastoy a kapay-an. Iti isasangpet
Pinadasko ti nagsursor kadagiti templo ti dios ken adipen.
Kasta met a pinagnak manen ti dana ti rebolusion, adu
A dir-i ken panagbirakat—“Itennag! Itennag! Itennag!”
Tapno iti kinalamolamo dagiti kalsada, iti oras ti milagro
Sagrapen ti kanalbuong, paltog, pulburo, karsel.
Batuta, saan a liplipatan ti panalpaak iti bakrang.
Ay, ti panaganikki ket kas met laeng ti bugtak ti amo
Iti nakaisadsadan. Nayanaktayo amin iti ili, anaknatayo
Ti ili nga ay-ayaten ngem ti ayatna ket mangiyaw-awan.
Ta ania kadi ti isukatna kadagiti datontayo a derrep,
Biag ken panagkabannuag no di panagsagrap iti tapok,
Igamerna daytoy iti digo sananto kadatayo ipaarub-ob?
Anian a kapay-an, kunam man, kailian, kapada a nagtawataw.
Anian! Anian! kunak met a panangikabesa iti sakit ti nakem.
Iti urattayo, ditoy a maibinta dagitoy a buya.
Saan laeng nga iti kudil ta adun itat’ pamuspusan
Tapno mapunas ti dusa ti init iti kinabarbangisit.
Kadagiti dara a maigamer amin dagitoy
Agtalaytay kadagiti selula ti bagi a bienestayo
Kadagiti ari-ari, dagiti addaan puonan, dagiti malalaki
Aminda nga addaan poder ta agatangda iti dawel
Kadagiti nepnep, layus, bagyo, ken pakpakaasi.
Isu a dimon panunoten ti sasaadentayo ita.
Dimon tagainepen ti agretiro kadagiti pangngadua.
Kasta ti yurit iti palad, kunatayo kadi lattan.
Makapalag-an iti dagensen ti kasta, uray no sinsinan.
Adutayo met ket a puli a kastoy ti nagbanaganna.
Nadamagmo kadin ti kaudian, daytoy panagipuslitda
Kadagiti kailian iti pagbabakalan? Sadiayda a makigubat—
Agbalinda a mersenario dagiti pupuraw a kinasiglat!
Kaano ti panagsublim iti pagtawatawan, iti lugar
Ti exilo a panangay-ayat iti daga a nakayakan?
Uray ta barotayo kano a bannuar, mannubbot
A mangisalakan kadagiti didigra ti pagilian.
-30-
A Solver Agcaoili
Hon, HI
Ag 2007
No comments:
Post a Comment