Epistolario Cuatro

Kenka, darundon a bunga: anghelka a kasisigud
Dagiti tanap iti sirmata. Dimo ammo ngem dinoblem

Dagiti numero ti ama: gasat iti gasat—kas iti superlotto
A saan a paspasarak. Wenno panangar-arit tapno tumayaka

Manen ken manen iti inaldaw-aldaw a panagparikna
Dagiti bituen, iti pannakibinnatogda iti bulan, init,

Dagiti ingar kadagiti baybay a mangliklikmot iti isla
Dagiti ar-arapaaptayo. Kas koma iti panangabakko iti diakpat:

Ay, diakton agsubli pay a paadipen kadagiti estranghero a bengngat,
Impaagong a kasla ketdi rummuar dagiti pangngarig iti panagtulakak

Wenno di panaganges tapno malagip iti apagkanito dagiti sakripisio
Iti altar ti panagexilo: gapu iti doliar, gapu iti dinar, gapu iti yen, euro—

Ay, aminen a kita ti sukat-bannog a sandi’t ila, pannakirurumen.
Kasla man laeng agimarmarotayo ita, kas idi: yaadayo kadagiti rabii

A paggaammo kadagiti aldaw a ditay pay masirpat ti rupatayo.
Ta ania ngarud ti aramiden iti nakaipalladawan no di ket agkurri

Kas iti sunay, wenno aminen nga aguddong, kas iti rueda
Wenno iti tikatik ti relo iti diding a mangipalnaad iti panagngilin:

Ita ti seremonia ti paw-it ta agur-uray dagiti dios a babassit,
Iti ili kas iti taeng, ngem mas iti ili ta ay-ayamenda piman

Dagiti pakakitkitaan iti bannog, panagkutim iti lua
Panagpunas iti nalimed iti anged a kabulon ti an-anek-ek.

Maysam idi pumanawak, ket iti isem ti kinainosente ti mapanawan.
Siasinnonto ti mangisala kenka, ti agkanta iti cancion a Gregorian

Ti “Tu es sacerdos in aeternum” a duayya a pasakalye ti turog?
Siak ti kantormo, balasangko a darundon, ket iti linia ti telepono

Sadiayko a dagulliten ti sam-it ni ayat, ti imnas ni dungngo
Ket uray laeng iti balikas, maallingagmo ti manglanglangan a karayo.

Anian ta kastoy a talaga ti gasat: kaslatayo sallapingaw
A dumarop iti tangatang, sumarot no kabaelan, kumarit

Iti angin. Ngem ta ti lagip kasinginnak: iti buniag
Iti ania daydin a bulan, nagtanamitimak a nagkararag:

Degdegam, Apo, degdegam ti karadkad ken pia ken ayat
Ti darundon a balasang. Isuna ti tartaraudi a daniwko—

Iti naganna a nasudi, sadiay ti ibatbati a kari:
Nasudiak met a pumanaw, nasudiakto met laeng nga agsubli.

Kas iti panagsubli dagiti arbis. Kas iti panagpadam-eg
Ti tudo iti rekkang. Kas iti panagbugi dagiti pagay kadagiti rangkis

Wenno ti panagbusel dagiti mansanita kadagiti bit-ang.
Kasta met laeng ti insawang iti umuna a panagkanaganan:

Nasudi ti darundon a balasang, ket nasudinto ingga’t kanibusanan.
Itag-ayko ti imak, no kasapulan. Ideppelko dagiti ramayko

No ti pammaneknek ket adda iti labes dagiti raya ti init.
Makitam ti pirmado a tulag, daan iti daan, baro iti baro—

Ket kas iti ipapanaw kasta met laeng ti panagsubli
Kadagiti aldaw, rabii, rag-o ken kontrata iti ginnasanggasatan.

Ania ngarud ket kasta met a talaga ti kapay-an: no di aganikki
Di met makaisakmol, di met mangan. Pipia pay dagiti napia laeng.

Isuda dagiti di pay nakasabat iti bisin, wenno nakakabbalay.
Ngem datayo, datayo a mismo ti agnagan iti manglanglangan.

Yagawatayo ti agbilang ta agpullonto met laeng dagiti kaibaan.
Kunak ngarud ita, darundon nga anak: Dimo laglagidawen

Ti yaadayo. Ipatom lattan a pimmanawak iti naminsayud.
Ibagam lattan a ti paw-it a Barbie ipatulodko a dagus.

Adda no kua kaiddam. Wenno sarsaritaam.
Dagullitem man ketdi ti panangibilimo iti presidente

A pasubliennan dagiti nagwalangwalang. Ibagam iti muniekam:
Pagawidenen ti presidente amin a nagtalapuagaw.

Kas iti panangipayapay iti aklo, wenno iti panangmanso iti bado.
Wenno iti panagorasion iti “Umaykan, umaykan, agsublikan!”
-30-


A Solver Agcaoili
Hon, HI
Ag 2007

No comments: