DEKADA SETENTA
(Maidaton kadagiti alumni ti Northern Luzon Teachers College-Mariano Marcos State University College of Education, Laoag City, iti panagtataripnongda manen. Pacific Beach Hotel, Honolulu, HI, Septiembre 8, 2007. Imbasa met laeng ti mannaniw iti daytoy a taripnong.)
Panagrarana dagiti rikna daytoy.
Panagkikita met dagiti pul-oy
Maipalais dagitoy kadagiti dalluyon
Ket iti maila a barukong nga agapon.
Mano kadin, aya, kakabsat a tawen
Manon a pinullo a nabartek a samiweng
Ti adda iti baet dagiti manglalangan a lagipyo
Dakayo a taraken pakasaritaan nga agkapuyo?
Lagipek ita dagiti daan a darikmat.
Kanalbuong kadi, aya, ti nangpaksiat
Kadagiti darepdep iti tanap ni regget
Kadagiti tagainep iti manursuro ni gaget?
Apay ta nagtalappuagaw dagiti kur-itan
Kadagiti dakulap ti ubing nga adalan?
Apay nga immadayo dagiti nasudi a kararag
Nakipagkatangkatangda iti angin a kas kaniak?
Dakayo a patanor ti lulem ti dekada setenta
Ania dagiti narasay a lualo iti panangaskasaba?
Ania dagiti batibat kadagiti himno ti rinnupak
Iti kakaisuna a pagilian a paidam iti ragsak?
Nabati ti nabati, a ta adda dagiti salamangka
Ti kinabannuar, panangidayyeng ti malmalanga
Iti orasion dagiti tarumpingay, wenno mutia
Mahika dagiti agsapa nga insikog ti sirmata.
Pimmanaw dagiti pimmanaw, a ta ania ngarud
A panagkiraos ti kasukat ti maimaro a birtud
No ti panagsagaba ket sandian dagiti appigud
Igamerda piman iti sadiwa a dara a maarub-ob.
Narikor a sublian ita ti dekada dagiti dung-aw.
Awan kadagiti gargarit’ silaw ti rabii a mawaw
Kas ita, iti dayeg ti tallaong ti panagrarana
Datayo a mangipapusot’ estranghero a rikna.
Babawientay amin a mabalin a mababawi.
Ngem adda patingga ti pakawan a kaasi.
Uray dagiti agkudaap nga agibit, agpulloda met
Ta kalpasan ti sennaey ket arig ti kammayet.
Tuluntonen man dagiti antigo a linabag
Ayna, awan sadiay ti birbiroken nga anag.
Adda kadagiti maidulin nga isem
Iti panangdagullit iti pamulinawen:
Daytay kigaw nga arapaap, di makaidna
A kadagiti baybay aglansad, agpagungga
Iti agpang dagiti dawel ken kurang a kappia
Iti henesis ti dumadangadang umuna a rikna.
Kas iti isusurnad ita wenno isasangbay
Iti daytoy a tallaong ti an-andingay
Kadagiti panawen nga agsubli iti tellaay
Tapno manen riingen agdudungsa a murmuray.
Wenno panangaklon, kunatay koma.
Panangaklon ti nagsasarak a parmata
Iti lugar dagiti agallaalla a katkatawa
Agbirbirok piman iti natalinaay a pagaponan
A ngem ta masansan a mapitotan ti kaibaan.
Agsisinnublikayonto manen, ammomi.
Agpipinnasarabokayonto kas sangaili
Iti labes dagiti lugar ken basingbasing
Agsisinarakto met laeng dagiti laing.
Aglugaykami ngarud, dakami a nanumo a saksi
Iti daeg taripnongyo, dakayo nga annak ti ili
Mannaritakayo itan iti maulitto a lilinnangen
Ket ti sagutmi ket bendision ti Mannakabalin.
A Solver Agcaoili
U of Hawai`i at Manoa
Honolulu, HI/Sept 8, 2007
No comments:
Post a Comment