Daniw Panagretiro

RETIRADO, RETIRADO

(Ken Manang Remy Baclig, miembro, GUMIL Hawai`i. Imbasa ti mannaniw iti selebrasion ti panagretirona, Ewa Beach, Hawai`i, Septiembre 8, 2007. )

Agretiro ti bagi, Manang Remy, ngem saan ti ayat
Agburayok daytoy kas iti derrep a ginnasanggasat
Ita nga oras ti saksi ti amin a daniw ti panagdalliasat
Panangnanam iti rikna ti al-alawen a rugso iti bigat

Ngamin ta ti aldaw nadonan, kas iti panagapon ti puso
Panagbirok iti taeng iti palasio dagiti amin a dungngo
Iti sulinek, kas pagarigan, dagiti amin a pangngarig
Sadiay a daytay kadkadua let agpasalakan iti allawig

Bilangentay dagiti kanito iti panagregreg dagiti busel
Panagsubli iti ikot ti panawen kalpasan ti basingkawel
Agbukar ti sabong iti panagbukar dagiti darepdep
Agpaikot kas iti alimpatok ti init iti saklot ti nepnep

Kadagiti ramaytay nga ikkan iti numero dagiti dawel
Ngem mano, aya, Manang Remy, ti basbas ti anghel?
Mano a pannagibi, mano a panangiyindayon, aklili
Mano a panagduayya iti takiag ti malalaki a rabii?

Kumpasam ketdit’ tadek kadagiti luppon’ Manong Eppie
Salaenyo ti sala ni innala, sala ti bagi iti bagi a kas idi
Iti pantok dagiti al-al nga agkammaysa, lagip man laeng
Iti turod makalay-at a darang, ay, saan a barengbareng!

Aglugaykami ngarud ita, iti panagretiro, udi ti inanama
Panaglak-am nam-ay iti naunday met pannakilumlumba
Iti pitik ti kanito nga itan, Manang Remy, ket tagikukua
Itan ket tagiurayen ti sardam a panagungar ti kararua.

Aurelio Solver Agcaoili
Universidad ti Hawai`i
Sept 8/07, Ewa Beach, HI

No comments: