Karinio ti Kutsilio

Pimmusayen ni Erlinda Adviento, binagsobagsol ti lakayna.
Manipud iti e-mail ni Charlene Cuaresma, Noviembre 10, 2007



Daytoy a damag ti pudno a di napakpakadaan.

Agluloken ti tumeng kas iti panagbibineg ti nakem
wenno panunot wenno ti piskel iti balikas
a mangirupir koma iti kalintegan dagiti natay.

Di ta idi laeng kalmen, iti Biernes dagiti agpipiesta
a panggep tapno masursuro ti dana ti linteg
a para iti sapasap, tinagtagainepmi amin ti maysa
a padaya ti ragragsak?

Martsa dagiti kalakian, kunami, kas iti kampay-idi
iti nagabay a Febrero wenno nasapa a Marso
dagiti mairakurak a rikna--kadagitoy a panawen
ti panagibunannag: ti lalaki iti babai iti nakettat
a tanikala ni ranggas, ni babai iti lalaki
iti panagdawat iti panagwaywayas.

Kas kadagiti ullaw a mapuruto
dagiti sabsabong a yan-anud ti danum
wenno ti pul-oy iti agmoy ti buokmo,
sika a naidasay gapu ta dimi ammo ti agkariar
wenno mangdusa koma iti tirad ti tadem.

Ket ideklara dagiti lallaki ti ayat nga awanan
ressat: saan nga ayat iti imuko a manggudgudas
mangpaksiat piman iti kinapimpiman
dagiti pukkaw iti santuario ti panaas!

Punsion iti panagirupir iti karbengan
kas iti panaggallaalla dagiti napudaw
nga ulep iti agsarsarimadeng nga aldaw.

Ngem ita, ania ngarud daytoy a nagbanagan?

Ti pannakaiwekwek ti balisong iti barukong
ket pasamak a kakas-angan, awanan gapu
ken adda iti ruar ti ikub ti pammakawan.
Punial daytoy iti kakaisuna a puso
ti sulpeng a ridaw, tawa, balay.
Wenno ti daraan a lino kas iti suelo
a nangaklon iti pannakaidasay.

Ta kasano a dangram dagiti sao ni ayat,
dagiti lailo nga immulam iti puso ti kapisi ti lailo
samonto met laeng babawien dagiti rabii nga agragut?

Anian nga ubbaw ti adda kadagiti dakulap,
dagitay diro kas pagarigan nga ilaok iti sabidong
wenno abrakadabraen a kantaridas
tapno ditoy a sangalen ti pammadso
dagiti aginmalalaki nga ima ti rapas?

Sangitamton ti kapay-an ti sapata
ti lalaki nga asawa ti babai nga asawa
ti pakpakaasi, gulib, dunggiar iti kararua.

A ngem ta maisublim kadi ti panagrupsa ti bagi
iti din agang-anges a lasag, iti iladon nga isem?

Arakupem ti manglanglangan a leddaang.

Ngem uray daytoy ket orasion ti tartaraudi
a karinio ti kutsilio nga agnagan iti bagbagsol,
waneknek ti tirad iti lagip iti daytoy nga angol.

Mawangawangan ti barukong ti babai.

Iti matrisna nga agdissuor amin a dara ti panagibtur,
tinawen, siglosiglo, dekadekada iti agraraman
a tapok. Kitaem ti imam, kuna ti tadem iti lalaki.
Sadiay nga agruting ti ti semilia ti salakan, agkukutel
kas iti pannusam iti kaasi ti nagmanto a tangatang.

Ibitamto dagiti rabii, lalaki a nasanting.
Agkarayamkanto iti daga kas iti uleg.

Ngem dinton agungar ti naidasay a samiweng.
Wenno ti duayyam kadagiti rabii ti balo a sagawisiw.


A Solver Agcaoili
UH Manoa, Nov 11, 2007