Inventario ti Leddaang

Agsaludotayo iti sietesiete a tawen
ket iti publiko a pannusa
maysamaysa nga ibagatayo
ti inventario ti leddaang
nga indulin iti maar-aradas a nakem.
Di ketdi agmawmaw ti panagsisinnangdo
a kunam la no nakagaruttayo
nga agpuerong nga aso.
Awan mailaksidmo iti kastoy
a buya. Iti daga a nakayanakan
a mismo ket ti komedia a pataranta
dagiti agisibbo iti pagan-anay
a daton ti ili kas iti bileg nga aggapu
amin iti ling-et ni Maria ken Juan
ken Procopio, marinero kadagiti baybay
nga agnagan kadagiti pirata ken ranggas
patagtagaboda amin kadagiti Arabo
a no agmando ket kabuyogna
ti panagkay-od kas iti panangiwekwek
iti mabagbagi a pangtulad iti panagiwekwek
iti tubo dagiti langis iti disierto dagiti amin a panagrabngis
wenno ti panagsuek ti tudo kadagiti rekkang
iti kataltalonan ditoy Stockton
a manipud pay idi ket sinangsangitanen ni Bulosan
inladawan ni Buaken a kas purgatorio ti gagem.
Saan a maungpot-ungpot dagitoy
ket awananda iti gibus.
Napipia pay dagiti estoria
ta agbanagda iti tuldek
ngem ditoy, dagiti imventario
ni ayat ket maysa pannakaimameg:
lamlamiongenmi ti amo tapno dinto agunget
ikinni ti patong tapno yarikap ti kliente ti yen
aramiden a kasla helikopter ti panagpuligos ti bagi
tapno iti pus-ong ket ti cheke ti maar-arakattot nga artek.
Adu pay: ti panagmartsa ti padi
ti panangipalkag manen ti naimbag a damag maipapan iti hunta
ti ebanghelio ti panagbirkog iti bulsa dagiti agpalpalama
ti puersa ti tangke ken kanion tapno maudatal
amin a kontra, amin a nakurapay, amin a palpalagip
maipapan iti engkanto ti hustisia
a para iti isu amin a pinarsua.
Dakkel a sao ti kastoy. Ditoy met ngamin
ti pakakiddisantayo iti adal tapno makita
ti rupa ti rebolusion a saan ket a puro diskurso ti langgong
wenno ti senador nga agmauyong.
Kas koma ti pagbirokan tapno saanen nga umadayo
ti ina a kakaisuna tapno ti anak ket di agbirok
iti sandi dagiti ulpit kadagiti rabii a nasipnget
a ditoy ket ti asuk a mangkulkullaap iti sirmata.
Dillawento manen ti mannaniw ti leddaang
daytoy a daniw. Ngem kunaekto: ikkanak
iti innapuy iti biag aldaw malem
tapno agsardengakon nga iti leddaang mangilalaem.
Kas koma iti daga a pagimurumoran
kadagiti amin a kita ti panarapato
iti nakaparsuaan ket ti pannakasaksi ti panagruting
amin nga itukit nga imbag. A ngem ta panguataanda
met amin a di mangan-ano, agraman ti dayaw ti mannalon.
Kumarkarappetda la ngaruden iti pitak ken bingkol,
aramiden pay laeng ti kabusor ti witiwit a pang-or.
Kas koma ti wayawaya. Nabayag idin a nagpauyo.
Addan kadagiti karsel, kadagiti kalkaltaang.
Maysan daytoy nga alimuken a no tukmaam
ket innakan itarayan. La ket ta di agbalin
a bugbugian a karasaen a gitana ti sindadaan.

A Solver Agcaoili
Hon, HI
Dec 28/07

No comments: