BACK TO BLACK. Dressed in black, relatives of victims of extrajudicial killings and enforced disappearances march to mark International Human Rights Day on Monday. PHILIPPINE DAILY INQUIRER, Dec. 11, 2007
No apay nga agpanes dagiti mabati,
Dayta ti intay saludsoden kadagiti rabii.
Ngamin ta uray ti sipnget ket agpasugnod
Iti kastoy a pasamak. Ti panagawan dagiti amma,
Inna, kakabsat, kakadua, addi, kabusor,
Kas pagarigan, isuda a makaibaga no ania
Ti rugi ti panungpalan.
No ania ti tungpal dagiti rugi iti panangirupir
Iti daradara a kalintegan ken panagragut
A mangisakmol met sagpaminsan iti udang,
Wenno kilabban a nalaokan iti taba ti baboy
A naperresan ti samatis ken bugguong
Ket ti riaw dagiti ungot ti mabisbisinan.
Saan laeng a daytay patis nga ingget angdod
Ta sadinno ngarud ti pagturongan ti kakaisuna
A mateggedan nga ayat iti ili no ti di panangsangaili
A nasayaat iti ipauneg, adda man ken awan.
Kunada, ti masapulan ket di pay kano umanay
Nga pakitienda iti tali, daytay magi wenno naylon
Ta nalagda bassit a pangirot iti tengnged tapno gibusan
Amin a sanaang iti dakulap, iti isip, iti panganan,
Iti panagapges ti rusok. Uray no maep-epan
Ti am-ammotay unay a lisay, agsubli ta agsubli dagiti sao
Nga addaan iti tirad wenno imuko wenno lanseta
Nga ipatilmonda kadatao.
Isu nga iti maysa nga aldaw, kuna ti amak:
Naktidiakes nga ili, nagtidiakes a mangmangkik.
Sungbatak ketdi dagiti pammabus-oy dagiti plakard
Ket kunaek iti maminpinsan: Sardengan ti kusit
Iti madagdagullit a panagsaraaw.
Nagmartsa ti amak kadagiti kalsada
Nga agik-ikkis iti nalabaga nga uni:
Sardengan ti kusit iti madagdagullit
A panagsaraaw. Sulpeng dagiti kalsada
Ken rabii ken malem a panagal-al
Tapno kadagiti rali a biroken ti balinsuek
Ti nailian a sennaay.
Ngem ta iti maysa nga aldaw,
Nagpukaw ti amak, kas iti tirgas
Kas kadagiti barbed wire iti Mendiola
Dagiti amin nga an-anek-ek, idi man un-unana
Agingga ita. Sari-ugma amin dagitoy itan.
Ket ti mito ni patay addan iti walangwalang.
Wenno iti manto nga aruattay ita
Para kadagiti amin a nagawan.
Kas iti amak. Ken dagiti amin mga amma.
Kas iti inam, ken dagiti amin nga inna.
Kas iti kabsatmo, ken dagiti amin a kakabsat.
Kas ti anakmo, ken dagiti amin nga annakmo.
Kas iti kabusormo, ken dagiti amin a kabusormo.
Pagnobenaantay dagiti manto, ikaasitay
Ti panangpaaddada kadagiti nagpukaw.
Kasla da man ket asuk iti dalikan a nagawan,
A ngem ta siaaron ti beggang. Ditoytayo
A mangrugi nga agpayubyob,
Mangiyallatiw iti apuy iti karubukob
Tapno mayebkas ti nangisit nga an-anug-og.
A Solver Agcaoili
Hon, HI/12-10-07
No comments:
Post a Comment