Rikkiarentayo ti Bituen

'TIS THE SEASON. Two Higaonon farmers from Sumilao, Bukidnon, make a star-shaped Christmas lantern using worn out slippers they and their companions used in their two-month march from Mindanao to Metro Manila and a placard bearing their demand. The Sumilao farmers are camped out in front of the DAR central office in Quezon City and vow to remain there until they are reinstalled as owners of land awarded them under government's agrarian reform program. PDI, Dec. 9, 2007

Rikkiarentayo ti bituen.

Rikkiarentayo ti bituen.
Sungsong daytoy kadagiti sipnget
Iti dekadekada a dagensen.
Namak pay ketdin ta saan
A sangarakem a bagas
Ti kayat a sawen ti linteg dingnguen
Wenno talon koma nga agas
Iti dapan nga agkarindanum.
Napadasam kadin ti nagkutim
Iti pimpiman? Idasarda daytoy
Iti ribo nga addang
Iti ribo a milia manipud iti Sumilao
Agingga iti Malakaniang
Sa ita, kas idi pungay kasta pay laeng,
Mausawanto pay laeng dagiti artek.

Idiay Isabela, kastada met idi.

Kas iti Hacienda Luisita dagiti adu
Ta adu latta a sansaning-i ti ili.

Anian ta saan nga agpapada
Ti nakayanakan nga apiliedo.
Kadagiti nagkaporete, yawat ti singkletas
Iti mangbalbalabala iti parol
Tapno agbalin a monumento
Dagiti estoria dagiti makiginnasanggasat.

Tirgasenda ngata manen
Dagiti darepdep a binukelda manipud
Kadagiti rabii ken aldaw iti dalan?
Wenno batutaenda kadi dagiti bisin
Nga adda iti karabukobda nga agpaparaw?
Ania ngata ti kuna dagiti katorse
Iti Mendiola a pinanakpak ti igam
Ti rehimen ti Aquino a kunatay idi a salakan?

Iti sabali a bangir, agrosario dagiti mamadre.
Iti sabali a bangir, aglitania dagiti papadi.
Iti sabali a bangir, agindulhensia dagiti seminarista
Sada salsalen ti utekda tapno agparipirip
Ti nagabito nga ulbod nga iparanudda
Kadagiti kumarkarappet ken apo daga.

Iti sabali a bangir, singpet-kiteb dagiti amin
A mannanakaw iti sagrado nga ostia:
Ti obispo nga amarilio, kas pagarigan
Wenno ti kleriko ti rosas dagiti rosas
Nga agtaraytaray tapno mailumba
Iti nobena ti dua a bulan a panaguray
Tapno laeng ta makagteng ti sipapayak a damag
Iti lapayag dagiti tuleng a rapas.
Misere nobis, miserere, kunkunada piman.
Miserere nobis met latta nga innang-angan.

Rikkiarentay ketdi ti bituen ti paskua.
Ilagatay dagiti addang iti nasantuan a malem
A ti sipnget maitanit' mannalon a din adipen.


A Solver Agcaoili
Hon, HI/Dec 8/07