Sapsapo ti Ima

Sirmataentay ti masakbayan, kas iti napalabas
Angep man wenno ulep a kimmapas
A lamlammiongen dagiti sallapingaw.
Kadagidi nga aldaw ti panawen dagiti libot
A panagtabuggatay kadagiti amin a santo
Ti tudo a nakiddit met no umay, no umay.
Ilibottay dagiti kararag kas iti panagtangar
Ti buto, mabisinka man wenno agtultulakakka
Gapu iti padaya dagiti nagpasina
Kadagiti raep, panagbilag
Ti panaginnala ti alsong ken bayo
Kas kadagiti rabii a ti appupo ti sipnget
Ti matris dagiti amin a panggep.
Agbabasa piman ti karabukob a naparkagan
Kadagiti pabuya ti panaglablabonan
Iti man puraw a kapitolio dagiti leddaang
Wenno iti presidensia dagiti butengtayo.
Ta kasano a saanam ti igam
A ti ungtona ket ti kanibusanan?

Amin dagitoy malaglagipmo ita
Iti walangwalang dagiti parparmata.
Adayokan kadagiti lagip. Iti kursada
Dagiti pangngeddeng ti daniw nga iti barukong
In-inawen bassibassit, manipud iti umuna a linabag
Aginggana iti panagpakada dagiti tugkel,
Sapsapuam ti imam iti tinta.
Pangisitem kas iti marka dagiti amin a basol
Ti umili iti ilina agraman dagiti duayya ti iruruk-at
No adda pay nabati nga uni iti agsapa.

Agpatpatnag ngamin dagiti isip
Nga agbirbirok iti umno a panagiladawan:
Kas iti tali nga isagut kadagiti amin a marigrigat
Wenno samal kadagiti amin a di makaamo
Iti bang-i dagiti kataltalonan
Kalpasan ti bayakabak dagiti dios a managlilipat.

A Solver Agcaoili
Hon, HI/12-08-07

No comments: