Sukutsukot a Bullalayaw Ditoy Manoa

Kastoy ti mito dagiti didiosen:
Ti bullalayaw ti pasmok dagiti gasat a napintas

Kas iti rama a pagaponan dagiti gurami
A nagpapauyuam naminsan ta rinaut

Ti pusa iti karatay. Binukelmo idi iti panunot
Ta pakabuklan ti panagtulakak dagiti babaknang

Iti ili a kunam la no dida ammo ti kayat a sawen
Ti dalikan a nakadalikepkep, din maar-aronan.

Adda pagsungrod, sangsanga dagitoy a madalapus
Masiksikkarud, wenno siitan nga iskarlatina a no agayam

Ket derosas amin a daga wenno kumarit iti kalgaw
Ti labbasitna, karitenna ti asul ti tangatang a di mangrikna

Iti pudot wenno rikki dagiti talon iti kuaresma
Dagiti lisay, a ta kas kadagiti kolonisador, tagikukuaenmi

Dagiti pagmaisan, aramidenmi nga entablado
Ti pagbabakalan, rinnaut, ubing a panaglalaaw.

Kabusor ti bangir, bannuar ti sabali a pangen
Ket iti uni ti 'Mapanen', rugianmi ti pinnapatay

Nga aggibus iti panaguper iti karayan.
Maupran ti uray la a di maan-ano.

Agkalamri ti kararua, kas iti panagkupit ti barukog
Wenno ti tian: awan maisubo iti uray ania a kita ti dangadang.

Agpigerger ti lasag ket uray ti kugitan a mabagbagi,
Sumanod a siaatap iti sellang, ta ania ngarud,

Kastoy met ti kapay-an dagiti ar-araraw uray
No yatang amin a kurrarayan wenno burias.

Di ngamin mapaglaok ti panagpukaw ti boses
Iti sidadata a pudno: manglangan amin a di mangan-ano:

Ti dulang, ti dakulap, ti eesman, iti man ngiwat
Wenno iti luppo. Ngem ita, ditoy Manoa.

Ayna, ta agkabannuag dagiti lagip a nangliwat.
Araken ti bigat dagiti napalabas a padpadaanan.

Ket baliksek amin a sao a diak inyes-esngaw iti siniglo
A panagkapkappuyon dagiti sakak, abagak, barukongko.

Saan a kas karina ti agbagkat kadagiti maris
Dagiti bullalayaw. Numuna ta no agpigsa ti bayakabak,

Agpukaw ti kari dagiti mangrabrabaii a mannanakaw iti aldaw.
Ikabesak dagiti sukutsukot a maris. Napia la a sukal ti ulaw.

A Solver Agcaoili
Hon, HI
Dec 22, 2007

No comments: