Kadkadua ti daniw

Maysa a kadkadua ti daniw.
Wenno ti daniw ket kadkadua.

Iti panangkamkamat
kadagiti pangngarig
tapno makaparsua iti baro a kanibusanan
tagibiennaka dagiti makapagungar
a panagsarimadeng dagiti ladawan
nga ipinta dagiti un-uni
iti dumdumngeg a lapayag:
adda sugat iti lagip
iti utek man nga agpanaas
wenno iti isip a manglanglangit.

Kasano ta iti met adayo
nga umasideg ti panagbukar ti rikna.

Kasano ta ti rikna
ket iti adayo a naggapuan
ti inna birbiroken iti inaldaw
a panagngatangata.

Nadagsen a panunoten nga iti ili
lamutennaka met lattan ti balikas
nga awanan iti kaes-eskan.

Ti panangsuitik ti ili iti daniw,
kas pagarigan. Ti pay umanay
pagbekkel ti tali ti kasukat
ti linnangsutan ta uray
ti kararua ti bagas inda met
pamsaakan.

Ti panangibulsa ti pagilian
kadagiti paulo ti metapora
iti agnanayon a ragsak
tapno iti lemmeng yaw-awan
ti arakattot ti panangkamat
ti anges iti sabali nga anges
iti alimpatok dua a puso
nga agkammayet, tumalakias
iti takiag ti panagwaywayas
tapno agsubli iti didigra
dagiti sinisuitik a ranggas
ti sao nga agballiudong
agbalasubas, mapan iti avenida
dagiti di mamingga
a dangadang dagiti arsab.

Di ket ta agbara iti karakaranda
dagiti di matilmon a katay
gapu iti pananglamlamiongda
kadatao. Di ket ta agbirri koma
ti daga ta alun-onenna amin
a mannaniw a balangkantis
a daniwda a balangkantis.

Di ket ta uray no tadtadem iti pino
amin a palso a darepdep
a pangam-ampogda kadatao
iramanda dagiti isemda a bangbangir
wenno ti puggaakda a magatadan iti riwriw
apo a manangngaasi, ay kailian, saan nga umanay
a pangsakada iti utang
kadagiti sanaang a di mabayadan.

Ita, iti sipnget ti aglawlaw
iti dayo a nakaisadsadan,
lagipek dagiti adu pay a dangadang
a mangabalbalay iti masakbayan.

Adu pay dagiti kas kaniak
nga agtalawataw tapno iti adayo
mangsangal iti namaris a bullalayaw
nga iti ilado nga idda ket maipalpalladaw
adayo kadagiti ules, wenno iti imeng
ti arkilado a siled ti sarindaniw ti bugagaw.

Kadkadua ti daniw
ti pangkontra iti minimini
kadagitoy a desuero a panagbalbaliw.


A Solver Agcaoili
Hon, HI
Feb 27/08

No comments: