(Ken Erlinda Adviento, maysa nga asawa a naidasay gapu iti kinaranggas iti taeng, Oktubre 28, 2007. Immuna a naibasa ti version daytoy a daniw iti Ingles iti mansayag/massayag ni Erlinda iti St John Baptist Church iti Kalihi, Honolulu, HI; naibasa manen iti Silent March kontra iti domestic violence a naangay iti State Capitol ti Honolulu; naibasa iti program ti radio a Filipiniana Variety Show; naibasa para iti online video version ti Honolulu Advertiser (babaen iti panangimaton da Zenaida Serrano ken Mike Gordon); ken maibasa iti Men's March, Febrero 23, 2008 iti Tenny Theatre iti Honolulu, HI)
Dimon mabasa daytoy a daniw.
Wenno mangngegan ti pannakayebkasna
Nga addaan gurigor wenno apuy
Kas iti pamsaakak no ti pungtot
Ket bumalay iti puso dagiti balikasko.
Dagiti frase a birbirokek birokendak met:
Maisayangkat daytoy a panagbinbinnirok:
Naidasaykan ket addakami amin ditoy
A sisasaranta ken mangim-imatang
Iti banag a nakarigrigat a maimatangan.
Ania a pungtot, ania ti naganna, ti adda
Iti tadem nga inaramatna a panggudas
Iti biag iti panagpakpakaasim,
Ribo dagitoy kas matimudko ita,
Umal-alingawngaw ken nakalawlawag
Uray no kadagiti dissotayo lemmesen
Dagiti allon ti panagriawmo
Ibagada ti maysa a malem a romansa
A mabalin a malagipmo?
Ket kas iti naynay a pasamak,
Nangngegam dagiti kari:
A saanen a madagullit,
Daytoy lasag iti lasag nga iti udina
Ket ti nakanganga a sugatmo.
Wenno daytay buteng iti tadem
Dagiti sentensia a kabulig dagiti buteng
Nga isu met laeng ti nagaramid.
Nakitam koma ti panagtarkok
Kadagiti mata ken ti panagmakaammo-ditanan,
Isuna ken sika, ken ti mangiwaragawag a signos
Ti panangretokar iti nabuong kas iti nakain-inaka
Nga itsura ti plato a seramiko, kas pagarigan,
Wenno ti nakadulin a talugadingna. A kas met kenka,
Kas mabalbalin nga insawangna iti baet
Ti panagay-ayatna kenka no ti lubong
Ket nalimpio, alerto, ken kabaelannaka nga isalakan.
Ngem ti estoria ti panagdangran ket kaskasdi,
Kas iti naliday a dayyeng, dadduma ket dagiti panaganug-og
A narigat man a mangngegan
Numan pay iti ulimek ket mangngegmi
Ti pannakasapul iti kaasi,
Riwriw dagitoy, kas iti ipalnaad dagiti lemma
Nga inka pay masagrap. Imbagam: kabaelak nga ibaklay
Dagiti dumteng a pasamak
Ket pinatidaka aginggana ita
Nga ita ket naidasaykan, wenno natayen,
Wenno di imbibbibiang.
Kasano koma nga agpakadakami kenka, sika
A kabsat dagiti sekreto a panagib-ibturmi?
Lallakikami met, ket makitami ti adda
Iti panaglaing wenno iti ritualna.
Koma ta ti lualo a pangdawat iti indulhensia
Ket mangted kadakami iti regta
Iti panangbuybuyami ti ipapapanaw
Panagsubli iti naggapuan kas rebbengna
Iti lugar ti kadkaduam tapno maawagam
Dagiti tattao ti puli, dawatem ti maudi nga akto
Ni ayat para kadagiti amin nga assawa a kas kenka
Para kadagiti amin nga assawa a kas kaniak.
A Solver Agcaoili
Hon, HI
Feb 13/08
Translated. 2-13-08
No comments:
Post a Comment