MANILA, Philippines -- In 1986, CBS Anchorman Bob Simon uttered these famous words while reporting about People Power at Edsa: “We Americans like to think we taught the Filipinos democracy; well, tonight they are teaching the world.” K. A. Alcantara, Inquirer, 2/24/08
Maisuro met ti demokrasia
kas iti panagallintok
sa iti pannagna. Namak pay
no iti kada askaw ket adda latta
ti kapetan, sarukod, wenno braso
a pamsaakan? Isu nga ita nga aldaw,
iti panagikkis dagiti kalsada
iti bale ti wayawaya, dumngeg
dagiti kanal nga ayusan ti dara
dagiti adu unayen a naidasay
gapu iti ar-araraw iti maminpinsan
a rapa, panagidiaya iti atang
iti sarukang iti EDSA dagiti nalabes
a pawayway. Mabangles met
dagiti maidiaya a taraon
kas iti pannakabannog ti karabukob
nga agtilmon iti katay
wenno pannakapaksuy
ti sangi nga aggalgal
no angin met amin ti maipauneg
wenno sangakiraos a panaas.
Kunada nga agulser met ti utek
iti kastoy a panaglanglangan
iti punsion dagiti agkamata
a bulbullagaw iti ili
di makakita iti rugit nga adda iti sao
ti itta iti maidasar a niniugan
a pangpatiray-ok kadagiti kaibaan.
Kadakami nga adda iti dayo,
mabatikami nga usisero
kadagiti pasamak ti kinatakneng
dagiti nabati iti ili.
Anansata maipalagip kadatao
ti panagbalikas dagiti ramay
kas iti signos ti laban
ti tamudo ken tangan
nga iti naglabas ket minimini
iti nasudi a pagbabakalan
dagiti amarilio a salakan?
Mabainkami koma nga agkomentario
gapu iti panaglangan kadagiti rali
ken demonstrasion nga am-ammo met
nga itan ket maysa laeng a buya
iti oras a panagpalpallailang
iti kapanagan ti iliw ken ila.
Ngem ania ngarud ta anakkami
met dagiti adu a dangadang
isu nga ibulosmi dagiti karit
iti karayan dagiti sansanaang.
Ilulualomi ti regget:
a makagteng daytoy iti aldaw
a maungpot ti kanibusanan
dagiti agimarmaro iti kaikarian.
Maisuro met ti demokrasia
uray kadagiti dadaulo
a kakunengan, iti napalabas
wenno ita a pakapilawan.
A Solver Agcaoili
Hon, HI
Feb 23/08
No comments:
Post a Comment