Ti Kinalinteg Ti Killo

I shall argue that justice cannot consist of any kind of harmony or consensus either in the soul or in the city, because there never will be such a harmony, either in the soul or in the city. S. Hampshire, philosopher


0. Ti Kuna ni Lozada

Saanda nga ammo ti dung-aw ti ili.
Sileng ti pirak ti kaibatogan ti panagsulpeng.
Adda bileg dagiti gatad a sumarot
Iti abut ti lapayag manipud iti piditpidit
Sumuknor iti rusok sa iti mabagbagi.
Sadiay a marikna dagiti sili, budubudo
Wenno keddel dagiti nagasang a balikas
Dagiti makipagili nga aglaklako iti nagan
Dayaw, biag, tagainep, ken maisakmol.
Kasano ngamin ta dagiti natakneng
Ket agpabuyada iti milagro dagiti kararag
Kas iti milagro dagiti diskurso a nalaokan
Iti diro, tagapulot, ken katkatawa.
Kadagiti rabii ken palasio a mapartuat
Ti masakbayan, iti ima dagiti mannanakaw
Iti saklot dagiti mannibrong, ditoy
Nga agpunsion dagiti arsab a ngiwat
Karabukob, gemgem, dial, ken tian.
Saanko a maalimon daytoy a panangliput:
Iti bassit a purok a naggapuan
Ket ti kinalinteg dagiti kaibaan
Ti kinamanangngaasi dagiti angin
Ti bendision dagiti engkantado a sardam
Isu a dimi kayat ti agsuitik
Uray no magatangko amin nga ayat.

2. Sungbat dagiti Traidor

Lungat laeng ti di agserbi
Kas iti bangkay nga awananen kaikarian.
Apay a sangnguen dagiti peggad
Iti rungsot dagiti mamirmiraut
No iti maysa laeng a kimat
Ket dagiti diamante iti porselana
A pinggan, kas iti balitok a kutsara
Ti pirak a tinidor, ti serbilieta
A pinamaga ti lulua dagiti manglanglangan?
Sarangten ketdi ti pakasaritaan
Ket iti panidna ti kinatakneng dagiti gapuanan:
Ti sangalibro a kari tapno mapunas ti killo
Nga iti laeng biblioteka nga agbanag.
Saan a nasken ti pannakapunas
Dagiti iskuater a tagainep:
Pinturaan laeng dagiti pader
Ket ideklara sadiay ti rebolusion
Iti wayawaya, ti rebelasion dagiti anghel
Nga agtagainep iti bangungot
Iti pus-ong kas iti pagilian.

3. Apokalipsis ni Lozada

Ibuksilak ti rugi ti paggibusan.
Ti linteg ket adda kadagiti ima
Puso ken panunot, kas iti tured
A mangisawang iti burburtia
TI mangyaw-awan. Alaek ti engkanto
TI balikas ket sadiay a birokek
Ti naisangsangayan a salakan.


A Solver Agcaoili
Hon, HI
Feb 18/08

No comments: