Kontra Agraraman

nouveau riche |ˈnoōvō ˈrē sh |
noun: [treated as pl. ] (usu. the nouveau riche)
people who have recently acquired wealth, typically those perceived as ostentatious or lacking in good taste.
adjective: of, relating to, or characteristic of such people : nouveau-riche social climbers.
ORIGIN French, literally ‘new rich.’

(Ken Ka Loren, gapu iti siudotna kontra kadagiti agum iti uray salamangka...)

Daytoy ti definision
ti isu amin a panguartaan:
isaldam ti anges dagiti kailiam.
Uray ti panagragut
ti palabra nga addaan honor
wenno maysa laeng
a panagpiangpiang
dagiti aggagatel a dila
wenno ngalangala
a maltutan. Anian ta maisubli
iti panangsaranget iti karit
ti aldaw ti kinaubing:
sumangpet ti gatas
a parabur dagiti puraw
ket iti trianggulo a papel
nga agbanag ti panagtakal.
Buttawan ti kimmot ti papel
tapno masultop ti parabur
ngem maigangal iti ngipen
ti utangen a doliar.
Mano ti napan iti ima ti pangulo
mano ti nayallawat iti bulsa ti babai
mano ti nagpuligos a napan iti apo padi
mano ti naipalimos iti kakaasi?
Ket ita, kas iti agnanayon:
anusam a bagi, anusam a bagi:
dikanto met ngamin nagpadi
dikanto met ngamin nagpresidente
dikanto met ngamin nagbalin a bibig
ti naktidiables a mannibrong
a no agnobena ket dagiti amin a rebulto
santa ken santo a babassit
matnagda iti patibong!
Ket ita, namak pay ta agririka:
iriagam koma dagiti kupal nga agraraman
nga assawa dagiti babaian
nga esposo dagiti lalakian
ukelda adda iti nabungsot a wangawangan
ti immimburnal a ngiwat a kabuyokan
dagiti madaydayaw a mangiramraman
iti basol a din masarkedan
dagiti baro a babaknang a garamugam
a kunam, sika a pasalsali
iti tagainepda a maisakibot uray
iti panagragut iti sellang iti rabii
isuda nga iti maysa pitik
wenno sangawarsi a nabangles a katay
ket kasukat sangasudo a ling-et
a no kalduen ket agas ti sagubanit.
Ngem ta: kasano met a digosem iti kaudian
amin dagitoy nga agraraman, isuda
nga agkudaap iti altar ti katedral
dagiti amin a kita ti panangiyaw-awan
la ketdi mabaloran ti am-amangaw
a kasingin ti sao a parparawpaw
isuda nga agsublisubli
kas iti bakbaka a di maipatlipatli?
Ala, anusam a bagi,
dikanto met ngamin nagpadi
anusam a bagi
ta kasta ti kasupadi
dagiti agraraman iti panagari.
Diak met kunaen nga urayen ti batang,
narigat met a traidoren ti sansanaang
narigat a ballikogen ti ledleddang
di met maliputan ti pangnamnamaan.
Agkararagka, kunak koma,
ngem uray iti bukod a pus-ong
dagiti dios naynayda a manglanglangan.
La ket ta: anusam a bagi
dikanto met ngamin nagpadi.

A Solver Agcaoili
Hon, HI
Mar 11/08