Sakramento ti Domingo

(Ken Nasudi, 6, iti panagturposna. Mabasananto koma daytoy iti maysa nga aldaw. Wenno tagtagailiwek daytoy.)

1.
Agsarsarimadengka a kaduam dagiti lagipmo
iti taeng, ket ti tagainep iti panagkikita manen
a napnuan estoria ket immunan a nakaawid.
Domingo itatta iti ayanmo, ket iti adayo
ket dagiti aldaw a mangbambantay
kadagiti tawen a panaglangan.

Ket agbilbilangka kadagitoy.

Maysa nga anak a babai, ti darundon,
ti agturpos kadagiti alfabetona
kannayon dagiti laso iti ubing a barukong
ket iti baet ti katawa ken panaglaglagip,
aramidenna amin a kabaelan nga agingles
iti wagas ti nasursuro iti pagbasaan:
'By the way, father,' kunana, tapno maburak
dagiti ulimek, 'by the way,' ket ti marakansion
a timek iti kinaubing agsadsad iti agpampanaas
a puso. Tempus fugit, kunam, iti Latinmo
nga aglatlatin iti ulom, ket ti Inglesna
agkayabkab iti angin iti Marikina. Ar-ararawem
a ti Ilokanona ket asidegto a kaarngi ti inadal a bengngat
ken dagiti pagsasao iti nagtaudan:
Mandarin ken Cantonese iti lilong a tumeng
iti parte ti inana, Pangasinan ken Espaniol
iti lilang a tumeng iti parte ti amana,
ken ti agnanayon nga ayat dagiti dadakkel
manipud iti manong nga agipasarabo iti Dunkin Donuts
manipud iti manang a manipud iti retaso
ket agdait iti bado ti Barbiena a silalabus
kadagiti umuna nga aldaw ti kalgaw.

Agpagunggan iti panagkatawana,
ti paggaakna ket umipos iti pul-oy
nga isarua dagiti derraas iti bantay.
'Umayka iti panagturposko?' saludsodna,
ket ti exilo iti pusom agriaw ti pannakadunggiar.
Ammona kadi ti distansia iti baet ti iliw
ken liday ken ti kinaawan bileg
a mangrangtay kadagitoy? Nalipatamon
ti mangyebkas iti sao a 'saan' gapu iti adu
a panaglangan kadagiti seremonia a kakastoy.

2.
Ti pagilian, sul-ot a kadarrato,
dinanto kaano man maammuan
dagiti babassit a leddaang ti kinaexilom.
Kadagiti kanito a kakastoy, agdependerka
laengen kadagiti sakramento iti Domingo:
babaen kadagiti malmalday a ramaymo
a mangpampanunot kadagiti makaagas
a laing iti panangsagid kadagiti panaglangan,
rosarioem dagiti kararagmo
ta sapay ta dumteng dagiti nararagsak
nga aldaw iti masanguanan.


A Solver Agcaoili
Hon, HI
Marso 10/08