MANILA, Philippines—Waves as tall as mountains battered the MV Princess of the Stars and within 15 horrifying minutes, the ferry carrying more than 700 people sank in typhoon-tossed waters off Sibuyan island in Romblon province, one survivor recounted. Inquirer, June 23, 2008
Kenka Padre Li Yang,
Nanipud idi Viernes ti rugi ti kalbario dagiti kailian.
Sika iti Sydney wenno Melbourne ket buyaem
ti ames dagiti pasamak. Siak ditoy Manila a no
agsaplit ti panawen ket latigoda met iti bakrang
kas iti panunot. Dagiti didigra ket saan a pagayaten
ti manangipateg a Dios: dusaenna kadi dagiti kapada
a no agdawat iti limos ket kas iti Lazarus
a ti maisakmol laeng iti agdama ti metro ti pannubbot?
Idi Mayo ken Hunio ken Hulio ket kaduata dagiti tripulante,
kas iti naayat a kapitan ti baroko nga MV Prinsesa,
sika iti panangideklara iti sagrado a bagi
iti sagrado a dara manipud iti agdadata nga ostia
agdadata nga arak ti ubas a nalabaga
siak iti dawatmo nga innak panagsermon
manipud iti Ebanghelio ti panaglayag
tapno mabirokan ti basi iti agpaspasukmon.
Kasano a malipatak dagitoy: agapon ti init
a mapantayo iti pantalan, kadua ti madre
nga uray ti anangsabna ket araraw ti panagpakawan?
Talaga met a naparukma dagiti ili nga am-ammom
dagiti ili nga am-ammok
dagiti pasamak a kabinnulig dagiti estoria iti agmatuon:
awan daytoy ita iti babaetmi
adda kadagiti ungto ti tangatang ti ipus
ti bagyo a nangibuarit iti balay ti namnamami.
Ita a bigat ket nangngegak ti timek ti nakalasat,
isunan sa ketdi daydi naayat nga aggitara
agpunas ti lamisaan sakbay ti misa
agipakni kadagiti gargaret para iti sumuno a kassaba?
Ita a matimudko ti natinggaw a panagdawat iti bendision
a kabulon ti manamnama a panagibtur kadagiti allon
ken pannakairanud iti taraon
idiaya tikapitan nga itan ket din matunton.
Diak masbaalan ti riknak, Padre Li Yang.
Kasano a malipatan dagitoy iti tengnga dagiti layus
iti laksid dagiti pilapila a mapan gumatang iti bagas
tapno laeng maaresto ti bisin
tapno laeng ti aliaw ti ipapatay ket iti karsel a mapupok
saan nga iti danum a manglemmes ti riaw
dagiti ubbing nga arub-uben ti dalluyon.
Basaek ti pagiwarnak. Butbutngennak dagiti numero:
pitogasut, padre, pitogasut kadagiti makassabaan
ti maitabon iti sementerio a danum.
No agsirnaut ti panawen, agsubliakto iti pier.
Agipaanudakto iti kararag iti nalinak a baybay
a mangbirok kadagiti sikkuder nga agpaypayapay.
A Solver Agcaoili
Marikina, Filipinas
Hunio 24/08
No comments:
Post a Comment