Mannubbot a Balikas

Agtagilasag ti balikas a mannubbot.
Kas iti antigo a dios wenno ti kaarngina,

agparnuay daytoy iti piskel
ken urat ken gitebgiteb iti puso ken pispis

iti distansia ti panagngangabit-ken-patay
ken panagungar dagiti imuko ti sao. 

Kadagiti awang ti isip, sadiay a mamunganay 
ti panangararua dagiti sabong a korona

dagiti managuyaw a rurog ti sadiwa a malem
a ti angin ket mangitayyek iti alipugpog

sa mangisagut iti narugit a tapok
iti mailansa a patiray-ok. Sadiay, iti kalbario

dagiti adu a panagtutuok ni mannaniw,
sadiay a magteng ti ungto ti pammadso.

Agrupsa ti lasag ti balikas, sagrado man
daytoy wenno adiadi laeng dagiti maumrasan

a panagun-unnoy. Kas iti sagiwisiw ti angin
iti ubing a sardam. Daytoy ti karinio

dagiti panawen, kuna ti angin, sana 
ipandanggo dagiti bulong iti arasaas ti parbangon

nga in-inawen dagiti bantay iti Tantalus
wenno ti Bimmaboy iti Ilocos dagiti agragut

a rikna. Iti akinkannigid nga ima ti panagbilang
kadagiti agpullo a pannakaidasay: sao kontra 

iti Sao iti agbaliwegweg a panagpasugnod
dagiti misterio nga iti sellang, sadiay nga agumbi

dagiti pimpiman a rugso. Saan ta saan 
a madagullit dagiti kaipapan dagiti rabrabak,

iti man internet a naglanglangayan ti dila
wenno iti saem dagiti balikas nga insawang

iti rabii dagiti daan a peggad nga iti surat
inyusuat dagiti gera iti pangngarig ti kontra-ayat.

Namak pay: sangadangan a sayangguseng
ti kaadu dagiti basol dagiti mortal a sao.

Iti lakasa ti panunot, idian ti agpakaasi
kadagiti katay a busbusbusen ni silalaing:

adda panawen ti husga uray kadagiti agmandi
a dingnguen. Saan nga iti karit ti puon

ti kaipapanan dagiti mannubbot a balikas.
Adda kadagiti palabras a makaited agas.

A Solver Agcaoili
Hon, HI
Agosto 31/08 

No comments: