Ken Lina Esta, iti panagkasangayna, Septiembre 2008
Idatonko dagiti linnaaw iti sappuyot dagiti busel.
Rosaska iti naridam a bigat, agriing kas iti duayya
Ti ina a malukag iti anil-il ti ubing
Ti maladaga dagiti ngatangata ti gasat.
Sika ngamin ti kakaen dagiti namnama
Iti kalsada dagiti pannakigasanggasat.
Adu a panagdaliasat, adu a panangnagan
Kas iti adu a panagkasangay ti arapaap.
Ngamin ta maysa a ritual daytoy:
Ti panangidayyeng iti kinaasinno
Iti silabaria dagiti maikur-it a kinatao,
Mapartuat iti parbo a kinadungngo.
Adda iti dakulap dagiti salakan.
Iti lukong, kas iti sentido ket ti sao
A kontra ti pannakaiyaw-awan
Iti man agmatuon wenno iti kaltaang.
Makaperdi iti salun-at, kunam a kanayon
Ngem narabaw ti iiseman, kas garikgik
Ti puso a kankanayon a mamakawan
Iti basol kas iti tawid ti agkibaltang.
Isu nga iti hardin dagiti baro a bannawag
Aguray ti sulbod kadagiti makabang-ar
A linnaaw, mangsutsutilto iti agberde
A bulong ti kalendario a manglalaaw.
A Solver Agcaoili, Honolulu, Hawai’i, Sept. 26/08
No comments:
Post a Comment