Panagkettel iti Biag idiay Kota Kinabalu

KOTA KINABALU--A husband, who suspected that his wife was unfaithful, blew her and himself up with a fish bomb in a house to the horror of their 13 children. Inquirer, Oct. 11/08

Sangapulo ket tallo a putot dagiti rugso 
ti inulila dagiti ayatmo, kabsatmi iti liday.

Kasinsindaka pay kadagiti nagkaadu
nga ipupusay iti pinggan nga awanan labay.

Iti pammateg iti asawa, iramanmo ti imon
nga iti sellang ket sadiay nga agipulong

kapiduadaka wenno atanuddaka
ta amintayo nga agkurkurang iti regta

makarikna iti kakastoy a panangilala.

anian ta inkipasmo met a di insalakan
ti ina dagiti sasainnekmo nga asawa

met laeng dagiti alimpatokyo
iti rabii a dakayo ket uramen

dagiti amin a kita ti ayat
a mabalud dagiti dilayo

ket ti laeng anangsab ti mangipeksa
iti nagkaykaysa a bagi dagiti ilayo

kasano a sinangalmo ti paulo
ti panagpagungga dagiti anus

ken allukoy, panangbasubli 
iti gartem tapno ti piman nga ay-ayaten

ket matalimudaw, dina makita
ti sabali a gagem dagiti dakulap

a nangsapsappuyot kenkuan
kadagiti kartaang ti rabii

a ti ridep ket agam-amangaw?

ti kadi uni ti kanalbuong ti mitsa
dagiti amin a panangkettel 

kadagiti din mailako a tagainep
uray no ibaratilio dagitoy iti Kota Kinabalu?

adu a saludsod, kabsat, kasinsin, kapidua.
adu a duadua ti madinamita iti baybay

dagiti parparmata. ita pay ta ti seremonia
ti panagsubli iti pagilian ket maymaysa

ita pay iti panagawid iti naggapuan
ket ti paragpag ti ayat ti asawam

idi a kas met laeng ita
ken sika iti pammategmo a naiwawa

A Solver Agcaoili
Hon, HI/ Oct 12, 2008

No comments: