Masaker

DAVAO CITY, Philippines—Jibin Arula heard them cry for their mothers as the bullets pierced their flesh, their blood spilling as the dawn was breaking. One by one, they fell, screaming Allah’s name in the midst of seemingly endless gunshots that shattered the silence on Corregidor Island. J. Tupas, Inquirer, Mar 9/09

Guduat' siglo a kari ti lipat
daytoy nga am-amangaw
ti pakasaritaan kadakami.

Itan, kibinek ti init
iti panaglennekna
iti naranghita a malem
ket ti baybay gumawgawawa
iti maimandala a pananglipat.

Makagargari ti panaglakay ti isip
ket iti dandanin agpito a dekada
a panangay-ay-ay iti kigaw a gasat
awan linteg kadagiti bibig
awan sumngaw a balikas
a mangipalnaad koma iti kapay-an
dagiti maratrat a lasag:
ti bala iti kanalbuongna
a mangwakwak uray 
ti apon ni ayat
iti barukong iti nagan ti ili
iti nagan ti Sulo a pagdagusan ti kararua
iti nagan ti Merdeka nga iti bibineg
kalpasan ti panagpagungga
dagiti karbin ti kapada
ket ti manglanglangit a kinatao.

Sadinno ti henesis ti kaasi
tapno agapokalipsis 
ti aginaldaw a demokrasia
a bambanti no kasta a ni patay
di mangrikna iti panagiyaplawna
iti kumpay ti pannakaipatli?

Raut ti lengguahe ti mision
a mangwayawaya iti ili:
singkuenta a pisos iti inaldaw
ti sandi ti biag a maiyappan
iti Corregidor nga isla 
ti pannakaiyaw-awan
kadagiti gubat iti imperio
iti sao kas iti puso
a ti basol a kakaisuna
ti panamati iti di pudno.

Lagipek ita ti napalabas:
ti eksena ti masaker ni ayat:

saganadsad a saganetset ti bala
iti agkabannuag a lasag
uray iti agiriag a dara
nga agpakawan awan labas!

Mangngegko ti ibit:

Nanangko, nanangko a nangipasngay
kaniak iti rigat, nanangko, nanangko
iti rigat met laeng ti pakatayak.
Siak daytoy.
Ken dagiti sabali
iti maulit-ulit a gundaway
agingga a ti ulimek
ti agari iti kanito ti ipupusay.

Mairingpas ti eksena, 
agrikep ti telon iti Corregidor.
Sisiak laeng ken ti isip a nadunor
ti testigo iti balinsuek a parabur.

Ngem uray ita, kalpasan dagiti tawen,
iti panangal-alia kaniak ti Merdeka
a gandatmi a gun-oden,
sisiak ken ti balikas
ti nabati a manmansuen
ti pakasaritaan 
nga iti agnanayon sulpeng.

A Solver Agcaoili
Hon, Hi/Mar 8/09

No comments: