Saan a nalatak ti nagan.
Ngem ti pannakaipatli
ket isu ta isu met laeng a dana
ti pammapatay kadagiti awanan gaway.
Isu met laeng a pakasaritaan daytoy,
Rebelyn Pitao, 20, maestra
dagiti agtutubo a gandat iti kinalinteg
ti nakem ket ti pannakapuyo ti puso.
Anian, anian, anakmi, anian a panagikaro
iti nagan ti ili ita ta kaduadakan
dagiti bannuar ti atiddog a rabii!
Iti damagka laeng a maam-ammo
ngem ti rupam ket ti ramesen
a madagdagullit ti agebbal a demonio:
ti demonio kadagiti lakko ti palad
a kadagiti uged ket ti naimbag a gasat
kadagiti soldado a mangaykayo
iti paragpag ti akimparagpag
ti demonio kadagiti bileg a naggapu
met laeng iti ili tapno iti kasta
ikipasda ti pakaasim, sika a maestra
ni ayat kadagiti maladaga a malem
ti demonio a mamagbalin nga ari
iti ulimek ti purok ti San Isidro
a kadagiti oras ti kinaagtutubo
ket ti panagsala koma iti fandanggo
tapno iti kumpas ket ti panangkamat
iti bullalayaw ti rugso nga agragrag-o!
Iti panapugsat ti anges ket
ti agmaymaysa a mangrabrabaii,
isuna a nakasiput
iti pannakarames ti naganus nga isip
iti maminribu a panagkiet ti kadkadua
gapu iti aliaw ti tirad a maiwekwek
iti ubing a bagi, maipalok kas iti sudsod
ti agmula iti sitaw iti bakras
ti immunan a pammakawanmo.
Duapulo a tawen, Robelyn Pitao.
Ngem saan nga umdas dagitoy
a maimaro iti allilaw ti ili
kadatayo a kasingin ti asi.
Uray iti ipupusay ket ti sinnungbat
iti rabaw ti bagi a buttabuttaw:
lima a duyok ngem ad-adu pay
ti sennaay sakbay ti ipapatay.
Kasano koma nga agriingka manen
agmurmuray bumangon iti baro a biag
iti maikadua a gundaway?
Kasano koma a ti agtedted a luami
nga iti nakapasagan ket ti wayawaya
dagiti mangimammameg a ramay?
A Solver Agcaoili
Hon, HI/Mar 6/09
No comments:
Post a Comment