ti oras kadagiti isla itatta.
Nariingak ti ridep
ket ti murmuray ti pamrayan
a manglinglingay iti maar-arakattot
a rikna a no makimalala iti gundaway
ket anangsab ti inna ipaay
iti kopita a malammin
agur-uray iti dengngep
dagiti ramay dakulap bibig
ken ti isem nga agkaranting
a kadagiti asuk ti kape
matda a makidinnengngep.
Agbagio dagiti agsapa itatta
kas patigmaan ti anunsio
dagiti tudo nga agkamata.
Kaanonto ngata a dumteng
ti apagdarikmat
iti panawen nga awan ressat
nga iti ngatangata iyaadayo
a nasapasap ket ti nagalusan
a kinadaksanggasat dagiti oras?
Riingem ti idda
tapno danggayanna
dagiti kansion ti saltek
nga iti masirmata a bautek
iti sementado a panggep
ket ti di mangliway a panagpasangpet
kadagiti burburtia iti iliw
a kaatag ti ules, pungan, langdet.
Ta, a, turogam dagiti aldaw
kas iti panangipunganmo iti rabii
sa iti panangilangdetmo
kadagiti daniw a mabibbibi.
Ti oras kadagiti isla iti barukong
ket ti kanito ti apagsipasip a parbangon.
A Solver Agcaoili
Hon, HI/Mar 4/09
No comments:
Post a Comment