Kas met laeng daytoy
dagiti adu nga estoria
manipud iti panaggibus
dagiti rugi a di inranta:
immayka, soldado
immayka, soldado
immayka kadagitoy nga isla
kadagitoy nga ima a ti lukong
dagitoy ket ti maysa a siglo
a panagsagaba:
ti baro a krus a landok
iti duogan a milagro
ti isu met laeng a napadso a Dios
dagiti kalbario a di mamingga.
Namuonantay amin iti riro:
ti gera dagiti igam, kas pagarigan
a maipaturong iti darepdep a namaris
kas iti ganggannaet a gandat
dagiti dadaulo ti ilimi idi
kas met laeng ita
iti awan patinggana a kurratsa
dagiti pangamaen
dagiti panginaem a no agarasaas
ket mangasaba iti ebanghelio
ti maaradas nga agsapa.
Awan ilelennek ti init iti kastoy
uray no lukibenta ti pakasaritaan
dagiti bantay a nagpasayasay iti dara
dagiti panaglib-at iti bukod a puli
tapno ti lengguahem ket matagikua
kadagiti kararuami ket umukuok
kas iti ut-ot wenno lung-aw.
Saankami nga anghel
saankami a demonio
saankami a santipikado a tao
a lulualuan dagiti balo.
Padpadasenmi met a lib-atan
dagiti pangngadua
tapno koma kadagiti kamposanto
dagitoy agsasamusam a rikna
ket dagiti gagem masbaalanmi koma.
Awanankami iti tagtagiruot
iti kabaelan a mangawat ti mensahe
iti Dios a puraw ket iti sierto a diskurso
ni McKinley a kasimpungalan dagitoy amin
a ribo a biddut,
matdakami a mapapaidaman:
kalintegan manen kadakami
ti impaidam dagiti mahukuspukos
a kanito itatta
idinto ta iti panagsubli
ket ti panangsaranget
kadagiti agtulid a bulong
ti agkabannuag a tawen
nga insangratda kenka.
Umay kenka dagiti igaaw
ket ti kudil a malammin
painaram daytoy kadagiti kapanagan
tapno malagipmo ti babai
nga iti bassawang
ket inawagam iti putam.
Umay kenka dagiti panagrururos
ket bilangem dagiti bulong
ti kappakappa a no agtayyek
iti malmalday nga angin ti Amerika
ket malagipmo ti rabii
a dagiti narakab nga ima
ken ti ruangan dagiti amin
a panagsagaba.
Igaedmo kadi, soldado
nga iti naminsan ket estranghero
kadagiti padasmi iti sentanario
ti pannakaikulbo, igaedmo
nga imameg dagiti lagip kadakami
iti panangsambuambo
madagullit a panagsambuambo
iti awanan regta a pakaasi ti babai
a kakaasi nga uray iti espiritu
ti arak iti siket kas iti patong
ket ti sarapa iti gita ti kulay-ong
iti nabartek a "Saan, saan"?
Iti panawen ti niebe nga iyuldagmo
dagiti kettang, lagipem
dagiti kuddakudda
lagipem ti nangisit nga aldaw
a ngilinen dagiti amin a maaradas
a rikna.
Magipmo ti arasaas
ti kuddakudda
malagipmo ti kansion
ti pumpon dagiti naguliban
a katawa?
Mano a pannakatay
ti masapul tapno agbiag ti lubong
iti pannusa ti naglemmeng a ruting
ti agdungdungsa a sabsabong
kadagiti bakras ti bantay
kadagiti teppang ti turog
kadagiti sappuyot ti sabangan
tapno iti ngirsi, wenno iti lagipmo kadakami
a pinanawam
iti daytoy iti rabii
a dimo makita ti rupa,
agpagungga a kas kenka
dagiti ayat a karissabong?
Iti panagrurusing ket
ti init a tagtagiurayen:
ti bara ti init iti kudil
ti nabiag a beggang ti lubong
nga iti ili ket impaidam.
Anansata pinalaemdaka
kadagiti ayab, iti aklo
kas iti sao, agpada a bumalay
iti barukong ti soldado
a rikna nga adda iti rugso.
Kinuna kadi ti babai
nga iti panangipawil ket ti saan
a ti wen ket iti panagkayang
iti sipnget kas iti rikna a karurugsuan?
Kinunana kadi, kas kadagiti lider
ti ili, nga iti apagbingngi a bibig
ket ti kaarngi dagiti gagem iti doliar
wenno ti babantot ken dagsen
dagiti militarisado nga ima
nga iti patong ket agbirok
iti apagapaman a salakan?
Adu a trahedia ti adda
kadagitoy a komedia:
ti mangkutim, kas pagarigan,
iti lua ket isu met laeng ti mangirugi
iti katawa ti agballa.
Dimi ammo dagitoy a pasamak
malaksid iti waragawag
ti pagiwarnak.
Adu dagiti agsipnget
kadakami uray iti kangitingitan
ti makarkararagan a lawag.
A Solver Agcaoili
Hon, HI/Abr 26/09
No comments:
Post a Comment