Naatap kaniak ti ridep.
Birokek ti nargaan a turog
kadagiti agpapauyo a pitik
ti rabii, naunday ken awanan umbi
dagitoy kas iti dung-aw
dagiti lungon, mante, umras
aminen a panagitabon
kadagiti kararag a pudno koma
ti estoria ti panagungar.
Ngem kasano a parmeken
dagiti namaris a tagainep
no ti parupa dagiti agngilngilin
a parmata
ket ti maminribu a saibbek
siak nga ina dagiti inulila
a lalaaw dagiti annak
dagiti annak nga iti wangawangan
ti pannakaikaranukon nga awanan
wayawaya ket ti bariwangwang
dagiti mapaksiat a bigat
kadagiti pannakamurmuray
iti panagsagaba?
Kasano nga alawem ti bagi
a dinan ammo ti kayat a sawen
ti karayo kadagiti bibig
wenno ti nairut nga arakup ti anak
ti maysa a saanen a makaaramid iti kastoy
gapu ta itan ket agrupsan dagiti ramay
kas iti panagrakaya ti lagipko kenkuana
isuna nga iti kaunnaan ket naam-ammok
ti agpang ti ladingit ket linglingay?
Kasano nga isalakanmo ti kararuam
iyadayom kadagiti amin a didigra
ti tirad ken tademi
ibaulmo kadagiti proteksion ti panagparintumeng
ti kararag kadagiti amin a nabibileg
tapno koma, iti kallautang dagiti buteng,
ket ti milagro a mangisalakan
kadatao iti adalem a mangliwengliweng?
Kadagitoy a pannangan iti tapok
ket ti mabatbati a panagibales
kadagiti sangi a makemkem:
ti sangi ti ina a tinallikudan dagiti annak
ti sangi ti asawa a binaybay-an ti
ti nangisagut naminsan iti ayat
ta amin dagitoy, iti soneto
dagiti balabala ti sarita nga aglubudoy
ket ti pangngarig ti pannakigasanggasat
nga iti tadem ket ti maikapis a pul-oy
a koma ket kadagiti rabiik a mangted
iti aangsan, angin a nasadiwa
iti agkuppit a barukong
a ngem ta maysaak a biktima
dagiti sentensia no kasano nga iti ibit
ket makasursuro a manglangan.
No mismo a dagiti kanito ti inana
ket awan kaniak ti lagip ti panagallintok
dagiti uppat nga iti barukong ket pinasusok
iti gatas ti pammateg, isuda nga iti takiag
ket inlillilik, pinaturog iti nasinggit a boses
nga aggapu iti tinawid nga aweng iti inak
addaan diro a lallay iti laksid dagiti gulib
ti asawa dagiti derrep nga iti udi
ket ti pananglaklakana a di panangipirit
kadagiti di maabbedan a sangsangit.
Paturogek iti bagi iti sainnek
ta ania ngarud ti pamuspusan
tapno iti apagbiit ket ti panagbakasion
iti naunday a sanaang?
Pito a tawen ti kadagupan dagitoy
a panagibaklay iti krus, iti kalgaw
dagiti am-amangaw iti Davao.
Maysamaysa a matumba dagiti annak.
Umagekda iti daga sadanton
di umanges tapno dagiti gagem
ti kabusor ket maipatungpal ti ebanghelio
ti dakes: barito dagiti rikna
agragut nga umapon kadagiti sardam
a pasakalye ti naunday a kaltaang.
Bagaak ti bagik tapno rumidep
tapno iti pannagna ti oras
ket ti panaglayag met iti tagainep.
Pilitek ti mangsirmata iti langit
a kadagiti hardin ket dagiti uppat
nga annak, uppatda nga agur-uray
kaniak iti lawag dagiti agpakpakada
a sipnget, ti Eden ti namnama
nga iti kinalinteg ket maipatungpal
ti awan labas a panangisakit.
Kas iti nagabay a panangarayat
dagiti mortal nga anghel
iti agluslusdoy a rikna ti maikadua
nga anak, sa ti maikatlo, sa ti maikapat:
agaruyot ti dara dagitoy kadagiti kinelleng
kadagiti kalsada sa kadagiti isip
tapno iti kaano man ket ti kontrata iti lagip.
A Solver Agcaoili
Hon, HI/ Abr 15/09
No comments:
Post a Comment