Ken Nasudi, inaudi a tagibi a nabati a nangtartaripato iti bukod a bagi iti baet ti kaawan ti amana iti sidongna tapno agbirok iti sabali a lugar kadagiti pamuspusan tapno agbiagda
Dagiti bulan ket siglosiglo a panagur-uray,
kankanayon, aggurgurigor, di makaidna.
Dua nga awag iti telefono iti maysa nga aldaw
manipud iti adayo a nakaisadsadan
ket di sufisiente a mangburak kadagiti pagel
iti baet dagiti agaddayo nga espasio
nga ad-adda nga am-ammo babaen iti panaglangan
iti kankanayon a kaaddam iti panagur-uray
iti mapagtalkan a panagkiriring ti telefono
para iti hello, ket kalpasanna ti goodbye
a dimo kayat a baliksen
kas iti panagkitakitmo a sika ti umuna
a mangibaba iti makina tapno maideklarata
a ti Panawen ket narunaw manen iti nagbaetanta.
Saan a pudno daytoy, ket dagiti naibukibok a senias
ti panaginkukuna manipud iti biangko
ket isu met laeng nga impostor a mannaniw
nga agikurkur-it kadagiti prosaiko nga asunto
maipapan iti lubong a binukel ti disente,
nainsiriban a sasao.
Babaen kadagiti babassit a ramay ti inaudi
a mangiwanwanwan kenka
maipapan iti no ania a bulan ti mangserra
iti garangugong iti baet ti panagpaw-itko
iti balikbayan box a ti naguneg daytoy
ket dagiti daton a munmunieka ken puripuritak
a sursurat maipapapan iti panagipateg
a linaon dagiti Post-Its tapno ammoyo
no asinno ti akimbagi kadagiti libro
dagiti katawa ken ti di pumanaw a ladingit
Iparawpawmo nga isarita maipapan
kadagiti eroplano a dumteng iti nasapsapa
kas ngem iti naituding a panagsangladda
kas paset ti pammati ti ubing a kas kenka.
Ngem siempre ti husga:
iti Paskua awanka
iti Baro a Tawen didaka mabirokan
Iti laksid ti panagpaseggedmi iti kandela
a babaen kadagiti silawda
ket maseggadanmi met dagiti rebentador
a pangpatakias kadagiti dagensen
iti tawen nga iti mabiit ket dumteng.
Addaka koma iti selebrasion ti familia
ubbaennak nga addaan iliw kas iti iliw
iti amin iti oras a nadanon ti panagsublim.
Ngem nagbuteng ti inam iti swine flu
ken idineklarana a ti panagbati
ket grasia ni Apo Dios.
Diakton makakaan ti burger steak
idiay Jollibee iti airport, protestam,
kas aramid a nakasanayam
iti innem a tawen idinto nga ilablabanmo
ti karbengam a sumabat iti imam
umuna a mangiputipot kadagiti kuttongi
nga imam iti nabannog a tengnged ti amam.
Kadagiti sesiontayo iti Skype ket dagiti kari
a rumbeng a maipatungpal:
agbalin a nasayaat, nasayaat, iti nagan ti Dios,
agbalin a natakneng. Iramanko dita ti bagik.
Agbennat dagiti oras no dagiti siglo
ti panaglangan ket marunaw kadagiti minuto.
Uray dagiti makan iti eroplano, maiservi
nga addaan panagkitakit ket panagbabawi,
saan a naimas ti panagramanmo kadagitoy
a kas iti tagainep ti inaudi nga anak iti burger steak.
Dumtengka, kas wagas ti panangiyeladom iti panawen
iti dua a bulan, ket pabaraem ti pusom iti duog a taeng.
Ngem nairantan ti ipapanaw, kas kinapudno
ket kadagiti adayo a lugar dagiti dardarepdep
agararawka laeng iti pannakabang-ar
daytay mangmarka iti panaggibus dagiti panaglangan
dagiti rugi ti kaaddam.
A Solver Agcaoili
Marikina/June 2/09
No comments:
Post a Comment