Arrawis

Food, please. Survivors of Tropical Storm "Ondoy" await for relief goods in Cainta, Rizal on Monday. Thousands of people are desperately short of food, water, and clothes. Inquirer, September 29, 2009.

Maitanggaya dagiti ima

iti rupa ti lawag

nga ita a Lunes

ket ti di makaidna

a pasamak.

Agkalamri ti rikna

iti panaguray iti kaasi

dagiti darikmat nga agpalpalama

kadagiti dungngo kas iti inayad

ti danum tapno iti apres

dagiti dalluyon iti kulay-ong

ket ti pannakapnek

iti agngangabit a taraon.

A ngem ta Ondoy daytoy

dagiti amin nga unnoy

nga iti segundo dagiti abuloy

ket ti pumusay a panagkapuy.

Ta kasano nga allukoyen

ti bagi kadagitoy a kalak-am

a kadagiti didigra a kastoy

ket pannakaibati iti walangwalang,

datayo nga in-inabo dagiti dekolor

a rigat iti amin a panagbirok

iti biag a nasayaat:

bigat malem bigat rabii

bigat aldaw bigat dagiti layus

amin dagitoy ket karaman ti kapay-an

nga iti udina ket ti al-alawen a biag

ti aramang iti nariper a danum

ti agbakbakwit a pakaragsakan?

Uray ti taeng dagiti mabibi a rikna

sadiayda kadagiti apres

iti sirok dagiti rangtay

kasalada dagiti gabat

a ti Ondoy laeng ti agsagrap:

gabat dagiti amin a gabat

a kadua dagiti uleg

nga uray iti bigbigat

ket kumarab-as: kas iti panaglemmeng

dagiti sardinas bagas asin

kas iti panagtalakias dagiti rasion

tapno kadagiti tiendaan sadiayda

a maiwaras kadagiti addaan a pirak

idinto a ditoy, kadagiti lenglengleng

ditoy, kadagiti purok ti pimpiman

ditoy nga agsagsagaba dagiti tedda

ti danum dagiti tedda ti layus

dagiti tedda dagiti adu a kari

ti pangulo dagiti panangngaasi

a baliodong!

Kadagiti arrawis

ti rikna, sadiay dagiti beggang

sadiay dagiti agkatkatawa nga apuy

agpaspasanaang kadagiti amin a dunor

agpalpallailang kadagiti amin a pakabtakan

ti ulo nga agpuerong!

Mabati dagiti rikna a bakwit,

mabatida kadagiti aldaw

nga agsubli dagiti uleg

tapno iti maysa nga addang

ket ti maikanatad a bales

kadagiti kaliado nga isip.

Idinto ta kunatayo dagitoy,

itag-ay ti ima tapno agsippaw

ti lukong ti palad kadagiti kaasi

nga iti panagsubli ti init maipalag.

A. Solver Agcaoili/Manoa/Sept 29, 2009