Panagpaniang

Kadagupan dagiti amin a remedio

ti panagpaniang, kas iti aramid

dagiti agbagbaglan idi un-unana

kas ita, pangbugiaw kadagiti amin

a dakes kadagiti tengnged, kilikili

kulay-ong, piditpidit, bibig, sang-aw.

Agdakiwas dagiti anak-ti-sal-it

a mannurat a rumbeng a mapaniangan

maiyadayo kadagiti inauna a gasat

a ti linabag dagitoy ket

orasion ti panagmalas.

Kas iti governador a pinendeho

dagiti pasamak, kas iti angin

a pinendeho ti buyok

kadagiti templo ti babassit a dios

nga adda iti putan ti paltog

kadagiti gemgem nga iti rupa

ti ing-ingungoten dagiti anangsab

ket iti rabii a naulimek isalikad

ti dimmiro nga arasaas.

Ibagada piman dagiti aramidda

kadagiti baraha tapno dagiti umiso

a numero ket maikarga iti pagurnongan

kadagiti amin a panagmamayo

ta ania ngarud, isu met laeng

nga isu nga estoria ti innapigud:

ti kaban ti ili ket para kadagiti durgi

isuda met laeng nga awanan sangi

tapno kadagiti mapendeho a saning-i

ket ti dayaw a magatang iti sabali!

Saan a rumbeng daytoy a sao:

ti panagtalakias dagiti birtud

tapno kadagiti Malakaniang

iti butillog, kas iti pispis ti pendeho

a pinendehot' kaarngit' panaguttog

ket ti takkitakki a ngiwngiw

dagiti nalaing iti paspasablog.

Ngarud alaen ti latigo, wenno ania

ditan a pagbasnat', ti lanut ti sabawil

no adda wenno ipus ti pagit' La Paz

tapno iti duri wenno iti bukot

ket isaplit iti garaw-rigi a kamalala

ti nagal-alusan nga ayat iti agsapa

a dagiti rikna ket agmalmalanga.

Siam a kamata kas siam a mata

tapno iperreng koma iti demonio

tapno iti panagpaniang ket pumanaw

ti manglimlimo nga espiritu,

isuna kadagiti sagawisiw ti gusing

a no agsawaw ti bimtak a bibig

ket namak nga agwingwingiwing.

Bugiawen ngarud dagiti di katataoan:

patalakiasen a papanawen

iti taeng dagiti kaibaan

bugtaken kadagiti kapitulo ti daniw

tapno kas kadagiti presidente

kas kadagiti mannaniw

agtabugga nga agpakita

kadagiti seguridad ti baraniw.

Gelgelen ti lalaki ti bulong

kas iti pananggelgel ti duldog

a mannurat iti papel a patibong.

Kadagiti lukong ti palad

a tumaud ti mapaniangan

a nalaes a galunggong.

A Solver Agcaoili

Hon, HI/Sept 5/09