MANILA, Philippines — Malacañang is sensing political “gimmickry” in Sen. Benigno “Noynoy” Aquino III’s so-called spiritual retreat before he decides on whether to run for president next year. C.V. Esguerra, Inquirer, Sept. 4/09
Rugiantayon ti karnabal:
Dagiti marigrigat iti maysa a suli
Dagiti agtabtabbaaw iti sabali pay
Sa dagiti nabendisionan a sentido
Ket ti pamsaakan ti mannamay:
Kuddakudda para iti agngayangay
Isuna nga heredero dagiti tarumpingay
Sa ti kuna ti sirkero a babai
Sa ti kuna ti sirkero a lalaki
Babai iti lalaki, lalaki iti babai
Dagiti agalimpatok a gargari
Ti pakaragsakan dagiti umili
Isuda a nagibati kadagiti nakem
Kadagiti bunton dagiti ansisit a barbangisit
Tapno iti aginaldaw a karnabal ni kusit
Dagiti bumbumsag a boksit ti suitik
Ket ti kari ti kararag a mensahe ti attit
Ti dios nga apo ti isu met laeng a marabutit:
Isu daytoy ti agkurimaong
Kadagiti luatayo, ditay piman
Nainaw kadagiti sabunganay ti nam-ay
Nga iti kaltaang ket ti ilulutuad
Ti mutia ti parawad a kadagiti maalualud
A gasat ken sab-ong ti sangapagilian a kinamalas.
Kuddakudda a pagitudokan
Kadagiti bileg tapno ti dagum ti mannamay
Ket iti barukong ti pangulo nga agbisaleg
Kas kadagiti amin a pangulo nga agsambuambo
A kadagiti suli ti sipnget agpalalo
Ket aguray iti mensahe ti arsab a saltek,
Agipakdaar naimbag a damag uray dakes:
Maysa para iti dua
Dua para iti tallo
Tallo para iti patupat ti pangulo
A kankanayon nga agkapat:
Maysa iti para iti ina, kas binglay
Maysa iti para iti ama, kas binglay
Maysa para iti inauna, kas binglay
Maysa pay iti kukua kas paspasaray
Iti awan patinggana a binnuray!
Namak pay a makabasol datao
Kadagiti binnilang, kas iti kudisi
No mauman iti karnabal
Nga iti inaldaw-aldaw ket maigamer
Iti nobena, sa iti basol, sa iti litania kadagiti santo
Sa dagiti mansado a pammakawan
Iti mansado met laeng a kibaltang.
Umadayo ti agtagtagainep: agpakni
Tapno iti sulinek dagiti hasienda
A nabukel iti dara ken anged
Nabukel kadagiti arapaap nga impawilda
A mategged tapno kadagiti likkaong
Dagiti kalsada ket ti bala para iti mangmangged
Bala para kadagiti amin a dardarepdep
Ket ti panagkararag ti agngayangay
Kadagiti pannakairingpas ti pangted.
A ngem ta ti kararag ket addaan iti paulo:
Ti naynay a di panangikankano
No manot’ pateg ti biagtayo
Ti kankanayon a panangiyaleng-aleng
Kadagiti bassawang ti agmurir a kanito.
Ala, ket itedtayo ti pammadayaw:
Ti panagpanunot iti nasin-aw
Panangiraman kadatayo iti sarindaniw
Ti tinnawidan a di panagbalbaliw.
Ta ania ket ngarud, maymaysa met ti nalaing
Dagiti laeng agnagan iti masanting
Dagiti mangan uray awan saing
Isuda a kadagiti aldaw agwagwagting.
Kastoy amin ditoy a karnabal ti ili:
Ti presidente iti inna panagbulbullagaw
Ti agngayangay iti inna panagsirko
Ket ti umili iti inda pannakaikulbo
Ta mamatida met ngamin amin
Uray no ti tiliwenda nga apputen ket angin.
Kastoy ditoy karnabal ti ili:
Ti sirkero ti agsagrap kaasi
Idinto a dakami, mangan uray awan saing
Agkamata a manguray iti linnaing.
A Solver Agcaoili
Hon, HI/Sept 3/09
No comments:
Post a Comment