1
Imbag ta diak minanso a pinatay
Dagiti ubing nga areng-engmo kaniak,
O Kailokuan, O ayat, O La Paloma
Daytoy kakaisuna a biag, sika a tagtagainep
Kadagiti agpatnag a naimut ti ridep
Sika a nangted kaniak ti pigerger
Kadagiti aglaklakaddugan a lasag
A kadagiti alimpatok nga agpatnag
Ket ti panagurok ti kakaisuna unay
Nga agngangabit, nalamiis nga iddak
Ket ti panagembalsamado ti pakakikiak.
2
Nakitaka kadagiti amin a lugar
Iti anniniwan dagiti anniwan
A dagiti paltikko ket sadiay
A ti ubing nga angesmo ket naidasay:
Ti gatilio kadagiti ngiwngiw a kasla
Bannatiran ti labbasitda
Ti luppom ti sippukel dagiti amin
A gartem nga uray kadagiti maila
A rikna iti agbasingbasing a kannag
Ket piman ta awan isuna: mayat a madi
Dagiti amin a madi a mayat
A mangringringgor kaniak
Kadagiti amin a ganggannaet a mariknak
No kasta a ti lapsatmo ket madupirak.
Agpadakaak kadi nga agkatawa,
O ilik, O Kailokuan, O ayat,
Sika a kadagiti agilili ket nakabirok
Met iti estranghero a ragsak
No kasta a kaduaennak dagiti bannog
Ket ti lakay a barukong ket agkuppit
A kasla nakamuregreg a pasas?
Ngem ania ta adda guardia
A kadagiti bileg ti pulikkaawko
Ket agmartsada a mangsurot
Amin nga ibagak. Kas koma iti daytoy:
Ti panangarrabis iti mangdangandangan
Iti kinatao kas iti kinamalalaki
Siak a no iti panagayat ket matda
A dagiti ay-ayaten ket kakaasi
Pimpimanda amin iti nalawag nga awag
A kinapimpiman, isuda nga agur-uray
No kaano isuda nga innak surnadan
Inggaan, wenno tukmaan wenno pasukuen
Kadagiti apros wenno pamutbuteng
Wenno iti kari nga iti agnanayon nga apagapaman
Ket ti agnanayon nga ayat ti bariwengweng.
O Kailokuan, O ayat, diak mamingga:
Sika, O ilik ti pakabuklan dagiti paripirip
Sika, O ayat dagiti darikmat, sika O ili
Ti kamalala dagiti alimpatok ti seggak
Ti kantada nga iti nakalukat a karsel ni ayat
Ket matda a gumawgawawa iti paggaak.
A Solver Agcaoili
Manoa/Oct 27, 2009
No comments:
Post a Comment